Prezidentga «O‘zbekneftgaz» faoliyati bo‘yicha hisobot berildi: tafsilotlar
Yil yakuniga qadar 1 million 100 ming tonna avtobenzin, 983 ming tonna dizel yonilg‘isi, 310
Prezidentga "O‘zbekneftgaz" faoliyati bo‘yicha hisobot taqdim etildi: batafsil ma'lumotlar
Prezident Shavkat Mirziyoyevga "O‘zbekneftgaz" aksiyadorlik jamiyatining joriy yilning birinchi yarmidagi faoliyati hamda yil yakuniga qadar amalga oshirilishi lozim bo‘lgan ustuvor vazifalari yuzasidan hisobot berildi.
Joriy yilning dastlabki olti oyida jamiyat tomonidan 11,5 milliard kub metr tabiiy gaz qazib chiqarildi. Shu bilan birga, neft, dizel yoqilg‘isi, aviakerosin va suyultirilgan gaz ishlab chiqarish hajmlari prognoz ko‘rsatkichlaridan yuqori bo‘ldi.
Yil yakuniga qadar 1 million 100 ming tonna avtobenzin, 983 ming tonna dizel yoqilg‘isi, 310 ming tonna aviakerosin, 606 ming tonna suyultirilgan gaz va qariyb 1 million 180 ming tonna sintetik mahsulot ishlab chiqarish rejalashtirilgan.
Dunyo miqyosidagi geosiyosiy vaziyatning keskinlashuvi natijasida Markaziy Osiyo yo‘nalishida aviaqatnovlar soni ortib bormoqda. Xususan, O‘zbekistonga amalga oshirilayotgan reyslar soni 2025 yilga nisbatan ko‘paygan. Joriy yilning iyul-dekabr oylarida aviakerosinga bo‘lgan talab 375 ming tonnani tashkil etishi, bu o‘tgan yilning shu davriga nisbatan 27 foizga o‘sishini anglatadi. Ushbu talabning asosiy qismi mahalliy neftni qayta ishlash zavodlari hisobidan qoplanadi.
Shu bilan birga, ayrim hamkor mamlakatlarda neft mahsulotlari eksportiga cheklovlar joriy etilganligi sababli, aviakerosin importi uchun muqobil manbalar, jumladan, Gruziya, Iroq va boshqa davlatlar bilan hamkorlik yo‘lga qo‘yildi.
Geologiya-qidiruv ishlarining sifati va hajmini oshirish maqsadida "O‘zbekgeofizika" aksiyadorlik jamiyatini modernizatsiya qilish rejalari haqida ham ma'lumot berildi. Kon-geofizika uskunalarini yangilash va zamonaviy dala 3D seysmik majmuasini xarid qilish uchun 38,8 million dollar yo‘naltirish ko‘zda tutilgan.
Shuningdek, xorijiy kompaniyalar, xususan, AQShning "Schlumberger" kompaniyasi bilan hamkorlikda seysmik ma'lumotlarni qayta ishlash markazini tashkil etish bo‘yicha ishlar olib borilayotgani ma'lum qilindi. Markazda zamonaviy superkompyuter majmuasi o‘rnatiladi, yangi dasturiy ta'minotlar xarid qilinib, seysmik tadqiqotlarda sun'iy intellektdan keng foydalanish yo‘lga qo‘yiladi.
Ushbu tadbirlar hisobiga yillik 3D seysmik tadqiqotlar maydoni 1 ming 800 kvadrat kilometrdan 5 ming kvadrat kilometrga, o‘rganish chuqurligi esa 4,5 ming metrdan 8 ming metrga yetkaziladi. Tayyorlanadigan istiqbolli geologik tuzilmalar soni 19 tadan 30 taga oshadi.
Quduqlar qurilishida yuqori harorat va bosimga chidamli materiallar, ultratovushli karotaj, real vaqt rejimida geofizik nazorat hamda gorizontal burg‘ilash texnologiyalarini joriy etish choralari belgilangan. Bu murakkab geologik sharoitlarda quduqlar ishonchliligini oshirish, mahsuldor qatlamlardan samarali foydalanish va yuqori debitga erishish imkonini beradi.
Davlatimiz rahbari aholi va iqtisodiyot tarmoqlarini neft mahsulotlari bilan barqaror va uzluksiz ta'minlash choralarini ko‘rish bo‘yicha topshiriqlar berdi.
Shuningdek, tarmoq korxonalarini texnologik yangilash, energiya samaradorligini oshirish, ishlab chiqarish xarajatlarini qisqartirish va belgilangan chora-tadbirlar ijrosini qat'iy nazorat qilish vazifasi qo‘yildi.