O‘zbekistonda yarim yilda 195 ta infratuzilma obyekti foydalanishga topshirildi

O‘zbekistonda joriy yilning birinchi yarmida 195 ta infratuzilma obyekti ishga tushirildi. Bu haqda Iqtisodiyot va moliya vazirligi ma’lum qildi.

Ushbu obyektlar 2026–2028 yillarga mo‘ljallangan Ijtimoiy va ishlab chiqarish infratuzilmasini rivojlantirish dasturi doirasida foydalanishga topshirilgan. Dasturni 2026 yilda amalga oshirish uchun byudjet tizimidan 23,9 trillion so‘m ajratilishi rejalashtirilgan. Bu mablag‘lar mamlakatning barcha hududlarida ijtimoiy va ishlab chiqarish infratuzilmasi obyektlarini qurish, rekonstruksiya qilish va modernizatsiya qilishga yo‘naltirilmoqda.

Hozirda 2 mingta obyektda qurilish, rekonstruksiya va kapital taʼmirlash ishlari davom etmoqda. Yilning dastlabki olti oyida loyiha-qidiruv ishlari, qarzdorliklarni qoplash va boshqa xarajatlar uchun 1,324 trillion so‘m sarflandi, bu yillik moliyalashtirish limitining 40,3 foizini tashkil etadi. Bajarilgan qurilish-montaj ishlari hajmi esa 12,369 trillion so‘mga yetdi.

Hisobot davrida taʼlim, sog‘liqni saqlash, muhandislik-kommunal, transport va suv xo‘jaligi infratuzilmasi obyektlari qurilishi yakunlandi.

Taʼlim sohasida yangi maktablar, maktabgacha taʼlim muassasalari va oliy taʼlim muassasalari foydalanishga topshirilib, 6 722 ta o‘quvchi o‘rni va 1 940 ta maktabgacha taʼlim muassasasi o‘rni yaratildi.

Sog‘liqni saqlash tizimida bir smenada 465 nafar bemorni qabul qilish imkoniyatiga ega ambulatoriya muassasalari hamda 696 o‘rinli statsionar tibbiy muassasalar ishga tushirildi.

Kommunal sohada 61,5 kilometr ichimlik suvi taʼminoti va kanalizatsiya tarmoqlari, shuningdek, 65,9 kilometr issiqlik tarmoqlari hamda yangi muhandislik inshootlari foydalanishga topshirildi.

Transport sohasida yangi avtomobil yo‘llari va yo‘l infratuzilmasi obyektlari qurilishi yakunlandi. Suv xo‘jaligi sohasida esa 435,8 kilometr kanallar va 80,1 kilometr kollektorlar foydalanishga topshirildi.

Shuningdek, maxsus va kichik sanoat zonalarining tashqi infratuzilma obyektlari, qirg‘oqlarni mustahkamlash inshootlari, maʼmuriy binolar, mudofaa va huquqni muhofaza qilish sohasi obyektlari, shuningdek, turizm infratuzilmasi obyektlari qurilishi ham yakunlandi.

Iqtisodiyot va moliya vazirligi dasturni amalga oshirish aholini zamonaviy infratuzilma bilan taʼminlash darajasini oshirish, hududlarning iqtisodiy salohiyatini mustahkamlash va yangi ish o‘rinlari yaratishga qaratilganini taʼkidladi. Vazirlik loyihalarni amalga oshirish muddatlari va sifati, shuningdek, byudjet mablag‘laridan samarali foydalanish ustidan monitoringni davom ettirmoqda.