O‘zbekiston va BAA ijtimoiy-gumanitar sohalarda hamkorlik loyihalarini amalga oshirishga kelishib oldi
Mamlakatimiz diplomatlari Sharja xalqaro xayriya jamiyati raisi o‘rinbosari Muhammad Rashid Beyat bilan uchrashuv o‘tkazdi, deb xabar bermoqda “Dunyo” AA muxbiri.
O‘zbekiston va Birlashgan Arab Amirliklari (BAA) ijtimoiy-gumanitar sohalarda hamkorlik loyihalarini amalga oshirish bo‘yicha kelishuvga erishdi. Bu haqda “Dunyo” AA muxbiri xabar berdi.
Toshkentda O‘zbekiston diplomatlari Sharja xalqaro xayriya jamiyati (SCI) raisi o‘rinbosari Muhammad Rashid Beyat bilan uchrashuv o‘tkazdi. Muloqot davomida SCI rahbariyatiga O‘zbekistonda so‘nggi yillarda aholining ijtimoiy himoyaga muhtoj qatlamlarini qo‘llab-quvvatlashga qaratilgan keng ko‘lamli islohotlar, ijtimoiy xizmatlarning shaffof va raqamlashtirilgan yangi tizimi hamda inson kapitalini rivojlantirishga yo‘naltirilgan davlat dasturlari haqida batafsil ma’lumot berildi.
Shuningdek, O‘zbekistonda amalga oshirilishi rejalashtirilgan ustuvor grant loyihalari taqdimoti o‘tkazildi. Ushbu loyihalar ta’lim, sog‘liqni saqlash, ichimlik suvi ta’minotini yaxshilash va ijtimoiy infratuzilmani rivojlantirish kabi muhim yo‘nalishlarni qamrab oladi.
Muzokaralar yakunida tomonlar amaliy hamkorlikning keyingi bosqichlari bo‘yicha kelishuvga erishdilar. Jumladan, SCI grant mablag‘lari ajratilishi mumkin bo‘lgan loyihalarni saralab olishga rozi bo‘ldi. Shu bilan birga, tegishli kelishuvlarni imzolash maqsadida SCI rahbariyati va mutaxassislarining 2026-yil sentyabr–oktyabr oylarida O‘zbekistonga tashrifini tashkil etish bo‘yicha kelishib olindi.
Ushbu uchrashuv O‘zbekiston va BAA o‘rtasidagi ijtimoiy-gumanitar hamkorlikni yanada mustahkamlash, shuningdek, mamlakatimizda aholining turmush darajasini oshirishga qaratilgan ijtimoiy loyihalar uchun xalqaro grant mablag‘larini jalb qilishda muhim qadam bo‘ldi.
Ma’lumot uchun, SCI 1989-yilda Sharja amiri shayx Sulton bin Muhammad Al Qosimiy tashabbusi bilan tashkil etilgan bo‘lib, bugungi kunda BAAning eng yirik xayriya tashkilotlaridan biri hisoblanadi. Tashkilot ijtimoiy himoya, ta’lim, sog‘liqni saqlash hamda infratuzilmani rivojlantirish sohalarida dunyoning 100 dan ortiq mamlakatida gumanitar loyihalarni amalga oshirib kelmoqda.