O‘zbekiston ayollar terma jamoasi CAVA chempionatini g‘oliblik bilan yakunladi
O‘zbekiston ayollar terma jamoasi CAVA Beach Volleyball Championship turnirida g‘olib bo‘ldi. Ikkinchi jamoa bronza medalini qo‘lga kiritdi.
O‘zbekiston ayollar terma jamoasi CAVA chempionatida zafar quchdi
Toshkent, O‘zbekiston (UzDaily.uz) —
"Olimpiya shaharchasi"da bo‘lib o‘tgan CAVA Beach Volleyball Championship xalqaro plyaj voleyboli turniri yakunlandi. Ushbu musobaqada O‘zbekiston ayollar terma jamoasi oltin medallarni qo‘lga kiritib, chempionlikni nishonladi, mamlakatning ikkinchi jamoasi esa bronza medaliga sazovor bo‘ldi.
Final bahsida O‘zbekistonning birinchi terma jamoasi Qirg‘iziston jamoasini 2:0 hisobida mag‘lub etib, turnir g‘olibiga aylandi. Uchinchi o‘rin uchun kechgan o‘yinda O‘zbekistonning ikkinchi va uchinchi terma jamoalari o‘zaro kuch sinashdi va unda ikkinchi jamoa g‘alaba qozondi.
Natijada, ayollar o‘rtasidagi musobaqada birinchi o‘rinni O‘zbekistonning birinchi terma jamoasi egalladi, kumush medallar Qirg‘iziston jamoasiga nasib etdi, bronza medalni esa O‘zbekistonning ikkinchi terma jamoasi qo‘lga kiritdi.
Erkaklar o‘rtasidagi musobaqada esa Eronning birinchi terma jamoasi birinchi o‘rinni egalladi. Qozog‘iston jamoasi kumush medallarga sazovor bo‘lgan bo‘lsa, uchinchi o‘rinni Eronning ikkinchi terma jamoasi band etdi.