“Oltin to‘p” uchun yangi da’vogar paydo bo‘ldi — Independent

“Oltin to‘p” sovrini uchun yangi nomzod paydo bo‘ldi — Independent nashri xabariga ko‘ra, Angliyaning “Manchester Siti” klubi va Ispaniya terma jamoasi yarim himoyachisi Rodri ushbu nufuzli mukofotni qo‘lga kiritishga asosiy da’vogar sifatida ko‘rilmoqda.

Rodri 2026-yilgi futbol bo‘yicha Jahon chempionatining eng yaxshi futbolchisi deb topildi. Ispaniya terma jamoasi finalda Argentinani qo‘shimcha bo‘limlarda 1:0 hisobida mag‘lub etdi. Turnir davomida Rodri 8 ta o‘yinda maydonga tushgan bo‘lsa-da, gol yoki golli uzatma muallifi bo‘lmadi.

2025/26-yilgi mavsumda u “Manchester Siti” bilan Angliya Kubogi va Angliya Liga Kubogini qo‘lga kiritdi. Rodri avval ham “Oltin to‘p” sovrinini yutgan — 2024-yilda Ispaniya terma jamoasi Yevropa chempioni bo‘lganidan so‘ng ushbu mukofotga sazovor bo‘lgan edi.

Nashr talqiniga ko‘ra, kuchli beshlikdan, shuningdek, angliyalik Harri Keyn, ispaniyalik Lamin Yamal, fransiyalik Kilian Mbappe va argentinalik Lionel Messi ham joy olgan.

“Oltin to‘p” mukofoti France Football jurnalining sobiq bosh muharriri Gabriel Ano tomonidan ta’sis etilgan. Bu mukofot ilk bor 1956-yilda Angliyaning “Blekpul” klubi hujumchisi Stenli Metyuzga topshirilgan. Dastlab g‘olib futbol jurnalistlari tomonidan aniqlangan va mukofotga faqat yevropalik futbolchilar da’vogarlik qila olgan.

1995-yildan boshlab esa Yevropa klublarida to‘p suradigan istalgan millat vakili ushbu mukofot uchun da’vogarlik qilish huquqiga ega bo‘ldi. 2007-yildan e’tiboran esa dunyoning istalgan futbolchisi “Oltin to‘p” sovrinini qo‘lga kiritishi mumkin.

2010–2015-yillarda mukofot France Football va FIFA hamkorligida topshirilgan. 2016-yildan boshlab esa yana ikkita alohida mukofot taqdim etilmoqda: biri France Football talqinidagi “Oltin to‘p”, ikkinchisi esa FIFA’ning yilning eng yaxshi futbolchisi mukofoti. FIFA ushbu mukofotni avval ham 1991–2009-yillar davomida topshirgan.