Markaziy Osiyo mamlakatlari Sirdaryoda suv resurslari hisobini avtomatlashtirish rejasini ishlab chiqishni ma’qulladi
Markaziy Osiyo mamlakatlari Sirdaryodagi suv resurslarini avtomatlashtirilgan tarzda hisobga olish tizimini joriy etish bo‘yicha reja ishlab chiqishga kelishib oldilar. Bu haqda Suv xo‘jaligi vazirligi xabariga ko‘ra, 7-avgust kuni Qozog‘istonning Turkiston shahrida bo‘lib o‘tgan Davlatlararo suv xo‘jaligini muvofiqlashtirish komissiyasining 94-yig‘ilishida ma’lum qilindi.
Yig‘ilishda sentyabr oyi oxiriga qadar ishtirokchi davlatlar vakillaridan iborat ishchi guruh tuzilishi kutilmoqda. Ushbu guruh Sirdaryo havzasida suv resurslarini avtomatik hisobga olish tizimini kengaytirish bo‘yicha ish rejasini tayyorlaydi.
Shuningdek, yig‘ilishda 2026-yilgi vegetatsiya davri uchun Amudaryo va Sirdaryo havzalaridagi suv olish limitlari hamda suv omborlarining ish rejimi muhokama qilindi.
Ma’lumotlarga ko‘ra, 1-apreldan buyon Shardara suv omboriga qariyb 3 milliard kub metr suv kelib tushgan, bu o‘tgan yilgi va ko‘p yillik o‘rtacha ko‘rsatkichlardan yuqori. Hozirda Sirdaryo havzasidagi vaziyat barqaror deb baholanmoqda.
Tomonlar suvdan samarali foydalanish, belgilangan limitlarga rioya qilish va davlatlar o‘rtasida suvga oid ma’lumot almashinuvini yaxshilash zarurligini ta’kidladilar.
Xabarda aytilishicha, "Asosiy masalalardan biri Sirdaryo havzasida suv hisobini avtomatlashtirish bo‘ldi. Bu yo‘nalishda ish rejasi loyihasini ishlab chiqish va sentyabr oyi oxiriga qadar ishtirokchi davlatlar vakillaridan iborat ishchi guruh tuzishga kelishildi".
Shu kuni O‘zbekiston va Qozog‘iston o‘rtasidagi suv munosabatlari bo‘yicha Qo‘shma ishchi komissiyaning yig‘ilishi ham o‘tkazildi. Unda ikki davlat hududida joylashgan 10 ta gidropostni avtomatlashtirish loyihasi ko‘rib chiqildi. Tomonlar loyihani yakunlash uchun grant mablag‘larini jalb qilishni tezlashtirish va keyinchalik avtomatlashtirilgan suv hisobini Sirdaryo havzasidagi boshqa obyektlarga ham joriy etish imkoniyatini o‘rganishga kelishib oldilar.
Eslatib o‘tamiz, may oyida Tojikiston, O‘zbekiston va Qozog‘iston "Bahri Tojik" suv omborining 2026-yil iyun—avgust oylari uchun ish rejimini kelishib olgan edi. Dekabr oyida esa Markaziy Osiyo suv xo‘jaligini muvofiqlashtirish bo‘yicha davlat komissiyasi 2025-2026-yillarning vegetatsiyadan tashqari davrida suv olish limitlari va suv omborlarining ish tartibini kelishib oldi. Unga ko‘ra, 2026-yilda O‘zbekiston Amudaryodan 22 milliard kub metr, Sirdaryodan 3 347 milliard kub metr suv oladi.