Konstantinovka uchun jang: Rossiya da’volari va frontdagi reallik
Ukraina Rossiyaning muhim logistik markazlariga zarbalar berishni tobora jadallashtiryapti. Rossiya ham uzoq masofali yopirilma zarbalarni kuchaytirgan. Lekin front chizig‘ida ko‘zga tashlanarli siljish deyarli yo‘q. Rossiya asosan kichik guruhlar bilan yashirin kirib borish usulini qo‘llamoqda. Eng shiddatli janglar Donetsk viloyatining Konstantinovka, Pokrovsk, Toretsk va Siversk yo‘nalishlarida davom etyapti.
Konstantinovka jangi: Rossiya da'volari va frontdagi haqiqat
"Geosiyosat" dasturi tahlilchilari front chizig'idagi vaziyatni sharhladilar.
**Abduvali Soyibnazarov:**
Frontdagi vaziyatni baholaydigan bo'lsak, hozircha keng ko'lamli o'zgarishlar kuzatilmayapti. Harbiy harakatlar asosan pozitsion janglar shaklida davom etmoqda. Xususan, Zaporijjya va Xerson yo'nalishlarida front chizig'i deyarli o'zgarmagan. Rossiya ommaviy axborot vositalarida vaqti-vaqti bilan ayrim kichik aholi punktlari egallangani haqida xabarlar berilmoqda, biroq bu frontdagi umumiy vaziyatni tubdan o'zgartiradigan darajadagi siljishlar emas.
Eng shiddatli janglar Donbassda, ayniqsa Donetsk viloyatida davom etyapti. Hozirgi vaqtda asosiy e'tibor Konstantinovka, Drujkovka, shuningdek, Kramatorsk va Slovyansk yo'nalishlariga qaratilgan. Turli manbalarda Rossiya qo'shinlari ushbu yirik aglomeratsiyalarga tobora yaqinlashayotgani haqida xabarlar bor. Xuddi shunday, Ukraina qo'shinlari Dnepropetrovsk yo'nalishida qariyb 300 kvadrat kilometr hududni nazoratga olgani haqidagi da'volar ham ehtiyotkorlik bilan baholanishi kerak.
Boshqa yo'nalishlarda ham vaziyat sezilarli o'zgarmagan. Harkiv va Sumi viloyatlarida pozitsion janglar davom etmoqda. Shu bilan birga, front chizig'idan uzoqroq hududlarda Rossiya uzoq masofali zarbalarni kuchaytirgan. Xususan, Nikolayev va Odessa viloyatlariga "Geran-2" dronlari, ballistik va qanotli raketalar bilan muntazam hujumlar uyushtirilmoqda. So'nggi paytlarda Rossiya "Banderol" qanotli raketalaridan ham faol foydalanayotgani kuzatilmoqda. Bu hujumlar, avvalo, Odessa viloyatidagi port infratuzilmasiga qaratilgan. Chernomorsk, Yujniy, Izmail va boshqa portlar muntazam nishonga olinayotgani sababli dengiz qatnovi sezilarli darajada qisqargan, ayrim yo'nalishlarda esa deyarli to'xtab qolgan.
Natijada Ukraina portlari faoliyati jiddiy cheklanib, xorijiy yuk kemalari xavfsizlik nuqtayi nazaridan ko'pincha Ruminiya portlariga yo'nalishni afzal ko'rmoqda. Biroq bu vaziyatni faqat Rossiya tashabbusni qo'lga olgani sifatida talqin qilish ham to'g'ri bo'lmaydi. Ukraina ham front ortidagi Rossiya harbiy va logistika ob'yektlariga uzoq masofali zarbalar berishda davom etmoqda hamda ayrim yo'nalishlarda muvaffaqiyatli operatsiyalarni amalga oshirmoqda.
**Shuhrat Rasul:**
Drujkovkada keng ko'lamli janglar boshlanishi uchun, avvalo, Rossiya qo'shinlari Konstantinovkani to'liq nazoratga olishi kerak. Taxminan uch hafta avval Rossiya Qurolli kuchlari Bosh shtabi boshlig'i Valeriy Gerasimov prezident Vladimir Putinga Konstantinovka egallangani haqida hisobot bergan edi. Bu avvalroq Kupyansk bir necha bor "egallangani" haqida berilgan, ammo keyinchalik tasdig'ini topmagan bayonotlarni eslatadi.
O'shanda Ukraina prezidenti Volodimir Zelenskiy: "Agar Rossiya haqiqatan ham Konstantinovkani egallagan bo'lsa, unda Putin bilan aynan Konstantinovkada uchrashishga tayyorman", degan mazmunda bayonot bergandi. Bunga javoban Kreml matbuot kotibi Dmitriy Peskov Rossiya shaharni nazorat qilayotganini ta'kidlab, agar Zelenskiy uchrashishni istasa, Moskvaga kelishi maqsadga muvofiq bo'lishini aytdi.
Biroq oradan qariyb bir oy o'tganiga qaramay, ochiq manbalardagi ma'lumotlar bu da'volarni tasdiqlamayapti. Xususan, xalqaro nufuzli institutlarning front bilan bog'liq jangovar xaritalari Konstantinovka Rossiya tomonidan to'liq egallanmaganini ko'rsatmoqda. Ularning baholashicha, shaharda hanuz intensiv janglar davom etmoqda.
Ob'yektiv baho beradigan bo'lsak, bir necha hafta avval Ukraina qo'shinlari shahar markazining ayrim qismlarini boy bergan edi. Biroq keyinchalik qarshi hujum natijasida nafaqat markaz, balki shaharning katta qismi ham qayta nazorat ostiga olindi. Hozirgi vaziyatga ko'ra, Ukraina qo'shinlari shaharning asosiy qismini ushlab turibdi, Rossiya esa ayrim yo'nalishlarda hujumlarni davom ettirmoqda. Bu holat xalqaro urushni tadqiq qiluvchi markazlar va ochiq manbalarga asoslangan jangovar xaritalarda ham o'z aksini topgan.
Suhbatni YouTube'dagi "Geosiyosatkunuz" kanalida to'liq tomosha qilishingiz mumkin.