Kiyev to‘lay olmaydi: Rossiya Ukraina yetkazgan zararni Yevropa “bo‘yniga qo‘ymoqchi”

**Kiyev to‘lay olmaydi: Rossiya Ukraina yetkazgan zararni Yevropa zimmasiga yuklamoqchi**

Rossiya Yevropadan Ukraina bilan urush natijasida yetkazilgan zararni qoplashni va "o‘g‘irlangan" mablag‘larni qaytarishni talab qilmoqda. Bu haqda Davlat Dumasi Xalqaro ishlar bo‘yicha qo‘mitasi raisining birinchi o‘rinbosari Aleksey Chepa "Lenta.ru" nashriga maʼlum qildi.

Avvalroq Donetsk Xalq Respublikasidan senator Aleksandr Voloshin Kiyev Rossiyaga Ukraina Qurolli Kuchlari tomonidan Donbass, Novorossiya va chegaradosh hududlarda yetkazilgan zararni qoplay olmasligini taʼkidlagan edi. Uning fikricha, bu zararni G‘arb mamlakatlari to‘lashi kerak.

Deputatning so‘zlariga ko‘ra, Rossiya ham G‘arb mamlakatlari singari yo‘qotishlarni qoplash uchun katta xarajatlar qiladi. Shu bilan birga, u Yevropaga urushga qo‘shgan hissasi uchun alohida talablar qo‘yilishini aytdi.

"Tabiiyki, biz ham katta investitsiyalar kiritamiz. Shuningdek, o‘g‘irlangan pullarimizni talab qilamiz va ularning barchasi bizga qaytariladi. Yevropadan tovon puli talab qilamiz, bu masala doimiy ravishda ko‘tariladi. Yevropani buni qilishga majburlashga kuchimiz yetishiga mutlaqo ishonchimiz komil", dedi Chepa.

Ilgari Ukraina Qurolli Kuchlari tomonidan Rossiyaga yetkazilgan zarar bir trillion rubldan oshgani haqida xabar berilgan edi. Taʼkidlanishicha, Kiyev yetkazgan zararni aniqlash bo‘yicha ishlar davom etmoqda. Avvalroq Ukraina prezidenti Vladimir Zelenskiy Putin urushni to‘xtatishga tayyor emasligini aytib, Rossiya 500 ming kishini safarbar etishga tayyorlanayotganini ma’lum qilgandi.