Jeki Chan “Mo‘jizaviy aslahalar 4” filmining suratga olish ishlari uchun Ozarbayjonga keldi

Jeki Chan "Mo‘jizaviy aslahalar 4" filmini suratga olish uchun Ozarbayjonga tashrif buyurdi

Mashhur aktyor Jeki Chan "Mo‘jizaviy aslahalar 4: Ultimatum" filmining ayrim sahnalarini suratga olish maqsadida Ozarbayjon poytaxti Bokuga yetib keldi.

Aktyorning Bokuda taxminan 10 kun qolishi kutilmoqda. Shahardagi suratga olish jarayonlarini tashkil etishda Qozog‘istonning Ozarbayjondagi elchixonasi yordam bermoqda.

Filmning asosiy suratga olish joyi Qozog‘iston bo‘lib, avvalroq Mang‘istov va Olmaota viloyatlari, shuningdek, Olmaota shahrida kadrlar olingan edi. Qozog‘iston tomonining taklifiga binoan Ozarbayjon film suratga olinadigan ikkinchi davlat sifatida tanlandi.

Bokudagi suratga olish ishlari shaharning eng mashhur joylarida amalga oshiriladi. Filmda Ichki shahar, Tog‘ bog‘i, Boku funikulyori, Yashil teatr va Favvoralar maydoni kabi diqqatga sazovor maskanlar namoyish etiladi.

Ushbu loyiha Qozog‘iston va Ozarbayjon hamkorligida amalga oshirilayotgan bo‘lib, so‘nggi yillarda Markaziy Osiyo va Janubiy Kavkazda yaratilgan eng yirik xalqaro kinoloyihalardan biri hisoblanadi. Mutaxassislar bu hamkorlik ikki mamlakatning kino sanoati, madaniyati va turizm salohiyatini xalqaro miqyosda targ‘ib qilishga xizmat qilishini ta’kidlamoqda.

"Mo‘jizaviy aslahalar 4: Ultimatum" mashhur franshizaning davomi bo‘lib, unda Jeki Chan 13 yillik tanaffusdan so‘ng yana afsonaviy sarguzasht izlovchi "osiyolik lochin" obrazini gavdalantiradi. Film premyerasi 2027-yilga rejalashtirilgan.