Iyun oyida avtomobil bozorining barcha segmentlarida faollik oshdi
Ikkilamchi bozorga yengil avtomobillar bo‘yicha jami savdolarning taxminan 61% to‘g‘ri keldi. Shu bilan birga, ikkilamchi bozordagi o‘sish sur’ati (16%) birlamchi bozordagi savdolar o‘sishidan (11%) yuqori bo‘ldi.
Iyun oyida avtomobil bozorining barcha segmentlarida faollik sezilarli darajada oshdi.
Iqtisodiy tadqiqotlar va islohotlar markazi O‘zbekiston avtomobil bozoridagi faollik dinamikasini muntazam ravishda tahlil qilib boradi. Ushbu tahlil avtomobil bozorining asosiy segmentlari va hududlar kesimidagi o‘zgarishlarni qamrab oladi.
Iyun oyi yakunlariga ko‘ra, avtotransport vositalari savdosi 80,2 mingtadan oshib, may oyiga nisbatan 18%ga ko‘paydi.
**Hududlar kesimidagi dinamika**
Iyun oyida respublikaning aksariyat hududlarida avtotransport vositalari savdosi o‘sdi. Faqat Jizzax viloyatida o‘tgan oyga nisbatan 2,2%ga biroz pasayish kuzatildi.
Eng yuqori o‘sish sur’atlari Surxondaryo (33,7%) va Xorazm (32,6%) viloyatlarida, shuningdek, Sirdaryo (29%), Samarqand (28,3%), Qashqadaryo (26,2%) va Andijon (26%) viloyatlarida qayd etildi.
Toshkent shahrida avtotransport vositalari savdosi bir oyda 9%ga oshib, 17,9 mingtani tashkil etdi.
**Yengil avtomobillar bozoridagi vaziyat**
Iyun oyida yengil avtomobillar savdosi 61,4 mingtani tashkil etib, may oyiga nisbatan 14%ga o‘sdi.
**Yengil avtomobillarning birlamchi bozori**
Yangi yengil avtomobillar savdosi hajmi 11%ga oshib, 24 mingtaga yetdi. O‘sishning asosiy qismi mahalliy ishlab chiqarilgan avtomobillar hissasiga to‘g‘ri keldi. Ularning savdosi 12%ga oshib, 18,8 mingtani tashkil etdi.
Xorijda ishlab chiqarilgan yangi yengil avtomobillar savdosi 5,1 mingtani tashkil etib, o‘tgan oyga nisbatan qariyb 7%ga yuqori bo‘ldi.
2026 yilning birinchi yarim yilligi yakunlariga ko‘ra, yangi yengil avtomobillar savdosi o‘tgan yilning mos davriga nisbatan 3,5%ga o‘sib, 157 mingtani tashkil etdi.
**Yengil avtomobillarning ikkilamchi bozori**
Iyun oyida foydalanilgan yengil avtomobillar savdosi 16%dan ortiqqa oshib, 37 mingtadan oshdi.
2026 yilning birinchi yarim yilligida ikkilamchi bozorda yengil avtomobillar savdosi qariyb 240 mingtani tashkil etib, o‘tgan yilning mos davriga nisbatan 18%ga kamaydi.
**Elektromobillar bozoridagi vaziyat**
Iyun oyida birlamchi va ikkilamchi bozorlarda elektromobillar savdosi 8,4 mingtani tashkil etib, joriy yilning may oyiga nisbatan 63,5%ga oshdi.
2026 yilning birinchi yarim yilligida 40 mingdan ortiq elektromobil sotildi. Bu o‘tgan yilning mos davriga nisbatan 40%ga ko‘pdir.
Respublikaning aksariyat hududlarida bozor faolligi oshdi. Faqat Sirdaryo viloyatida 2,9%ga pasayish qayd etildi.
Eng yuqori o‘sish sur’atlari Jizzax viloyatida 101%, Buxoro viloyatida 64,6% va Farg‘ona viloyatida 58,5%ni tashkil etdi.
Elektromobillar savdosining asosiy qismi Toshkent shahri hissasiga to‘g‘ri kelmoqda. Iyun oyida poytaxt ulushi bozor umumiy hajmining qariyb 63%ini tashkil etdi. Savdolar may oyiga nisbatan 78%ga oshib, 5,3 mingtaga yetdi.
Iqtisodiy tadqiqotlar va islohotlar markazi
Jamoatchilik bilan aloqalar sektori