Germaniyada xavfsizlikka oid xavotirlar kuchaydi
Germaniyada o‘tkazilgan ARD Deutschlandtrend so‘rovnomasi mamlakat aholisi orasida xavfsizlik, terrorchilik va migratsiya masalalari bo‘yicha xavotirlar kuchayganini ko‘rsatdi. Shu bilan birga, hukumat faoliyatidan norozilik yuqori darajada saqlanib qolmoqda va o‘ngchi «Germaniya uchun muqobil» (AfD) partiyasining ommaviy qo‘llab-quvvatlanishi ortib bormoqda.
Germaniyada xavfsizlikka oid tashvishlar sezilarli darajada oshdi. ARD Deutschlandtrend tomonidan o‘tkazilgan oylik ijtimoiy so‘rov natijalariga ko‘ra, har uch nemisdan biri terrorchilik hujumi qurboni bo‘lishdan xavotirda. Bu holat 25-iyul kuni Berlinda sodir etilgan teraktdan so‘ng xavfsizlik masalasi mamlakat siyosiy kun tartibida ustuvor ahamiyat kasb etganini ko‘rsatadi.
So‘rovda qatnashganlarning 69 foizi terrorchilik xurujlari xavfini yuqori deb baholagan. Bundan tashqari, 56 foiz o‘ng ekstremistlar, 50 foiz esa so‘l ekstremistlar tomonidan hujumlar sodir etilishi mumkinligidan xavotir bildirgan.
Migratsiya siyosati borasida ham qat’iy fikrlar kuzatilgan. Nemislarning 71 foizi 2024-yildan buyon amal qilayotgan chegara nazoratini davom ettirishni qo‘llab-quvvatlaydi. Shu bilan birga, 59 foiz migratsiya muammosini milliy emas, balki Yevropa Ittifoqi darajasida birgalikda hal qilish samaraliroq deb hisoblaydi.
Siyosiy reytinglarda esa o‘ngchi "Germaniya uchun muqobil" (AfD) partiyasi o‘z mavqeini mustahkamlashda davom etmoqda. So‘rovga ko‘ra, partiya reytingi 28 foizga yetgan bo‘lsa, XDI/XSI konservativ bloki 21 foiz bilan tarixiy past ko‘rsatkichlardan birini qayd etgan. Qolgan partiyalar reytingi deyarli o‘zgarmagan.
Tadqiqot shuni ham ko‘rsatdiki, federal hukumat faoliyatidan nemislarning 85 foizi norozi. Respondentlarning 68 foizi yaqindagi kadrlar almashinuvidan keyin ham vaziyat yaxshilanmasligiga ishonadi. Shuningdek, aholining 55 foizi Germaniyada tub o‘zgarishlar amalga oshirilishini xohlashini bildirgan.
So‘rov natijalariga ko‘ra, ayniqsa AfD tarafdorlari o‘zlariga nisbatan adolatsiz munosabatda bo‘linayotganini his qiladi. Ularning 70 foizi jamiyatda o‘z ulushidan kamroq imkoniyat va manfaatlarga ega ekanini aytgan. Butun mamlakat bo‘yicha esa respondentlarning 43 foizi o‘zini boshqalarga nisbatan kamroq imkoniyatlarga ega deb hisoblaydi.