Fargʻona viloyatida 800 oʻrinli shifoxona quriladi
O‘zbekiston Respublikasi Bosh vaziri o‘rinbosari Jamshid Xodjayev hamda Saudiya Arabistoni Podshohligi Sog‘liqni saqlash vaziri Fahd bin Abdurahmon Al-Jalajil boshchiligidagi delegatsiya ishtirokida “Fergana Hospital” loyihasi taqdimoti bo‘lib o‘tdi.
Fargʻona viloyatida 800 oʻrinli shifoxona barpo etiladi
Toshkent, Oʻzbekiston (UzDaily.uz) — Oʻzbekiston Bosh vaziri oʻrinbosari Jamshid Xodjayev va Saudiya Arabistoni Podshohligi Sogʻliqni saqlash vaziri Fahd bin Abdurahmon Al-Jalajil boshchiligidagi delegatsiya ishtirokida “Fergana Hospital” loyihasining taqdimoti boʻlib oʻtdi.
Maʼlum qilinishicha, Saudiya Arabistonining “Vision International Investment Company” kompaniyasi bilan davlat-xususiy sheriklik (DXSh) asosida Fargʻona viloyatida 800 oʻrinli zamonaviy koʻp tarmoqli shifoxonani xalqaro standartlarga muvofiq loyihalash, moliyalashtirish, qurish, jihozlash hamda uzoq muddatli texnik xizmat koʻrsatish boʻyicha muhim kelishuvga erishildi.
Ushbu loyihaning umumiy investitsiyaviy qiymati qariyb 300 million AQSH dollarini tashkil etadi, qurilish muddati esa 36 oyni tashkil qiladi. Mazkur shifoxona Markaziy Osiyoda DXSh modeli asosida amalga oshirilayotgan eng yirik sogʻliqni saqlash obyektlaridan biriga aylanishi kutilmoqda.
Yangi tibbiyot majmuasi Fargʻona viloyatidagi beshta ixtisoslashtirilgan tibbiyot muassasasini yagona kompleksga birlashtiradi. Natijada viloyat va unga tutash hududlar aholisi uchun kardiojarrohlik, neyrojarrohlik, organlar transplantatsiyasi, nefrologiya va ortopediya yoʻnalishlarida uchinchi darajali yuqori texnologik tibbiy xizmatlardan foydalanish imkoniyatlari yanada kengayadi.
Shuningdek, majmua tarkibida 160 oʻrinli intensiv terapiya va shoshilinch tibbiy yordam boʻlimlari hamda barcha zarur yordamchi klinik xizmatlar faoliyati yoʻlga qoʻyilishi koʻzda tutilgan.
Taqdimotda ushbu loyihani amalga oshirish istiqbollari muhokama qilindi.