Emapta oʻz xizmat koʻrsatish faoliyatini kengaytirish uchun Oʻzbekistonga koʻz tikmoqda

Emapta xizmat ko‘rsatish faoliyatini kengaytirish maqsadida O‘zbekiston bozoriga kirishni rejalashtirmoqda.

Toshkent, O‘zbekiston (UzDaily.uz) —

Global Business Services Forum (GBSF) 2026 doirasida O‘zbekiston Respublikasi Raqamli texnologiyalar vaziri Sherzod Shermatov Emapta Global kompaniyasining Bosh samaradorlik bo‘yicha direktori Roy Figueroa bilan uchrashuv o‘tkazdi. Muzokaralarda IT Park Uzbekistan vakillari, jumladan, Eksportni rivojlantirish bo‘yicha direktor Jahongir Kagirov ham ishtirok etdi.

Emapta 10 000 dan ortiq mutaxassisni birlashtirgan holda, autsorsing, Employer of Record (EOR) xizmatlari va taqsimlangan jamoalarni boshqarish bo‘yicha yetakchi xalqaro kompaniyalardan biri hisoblanadi. Hozirda kompaniya 30 dan ortiq mamlakatdagi 1 000 dan ziyod mijozlarga xizmat ko‘rsatadi va global servis markazlari tarmog‘ini kengaytirish uchun yangi yo‘nalishlarni izlamoqda.

Uchrashuv davomida O‘zbekistonda Emapta servis markazini tashkil etish imkoniyatlari, pilot loyihalarni ishga tushirish, oliy ta’lim muassasalari bilan hamkorlikda mutaxassislar tayyorlash hamda xalqaro mijozlarga xizmat ko‘rsatadigan jamoalarni shakllantirish masalalari muhokama qilindi. Shuningdek, IT Park ekotizimi, davlat tomonidan taqdim etilayotgan qo‘llab-quvvatlash choralari va xalqaro kompaniyalar uchun yaratilgan imkoniyatlar haqida ma’lumot berildi.

Tomonlar hamkorlik bo‘yicha yo‘l xaritasini ishlab chiqish, keyingi ishchi uchrashuvlarni tashkil etish hamda Emapta’ning O‘zbekistondagi faoliyatini yo‘lga qo‘yish istiqbollarini birgalikda o‘rganishni davom ettirishga kelishib oldilar.