Davlat tili bo‘yicha maslahatchilarga yangi vazifalar yuklatildi
O‘zbekistonda davlat organlari va tashkilotlari rahbarlarining ma’naviyat va davlat tili masalalari bo‘yicha maslahatchilari faoliyatining yangi tartibi belgilandi. Ular davlat tiliga oid qonunchilik ijrosini nazorat qilish, hujjatlarning til me’yorlariga muvofiqligini ta’minlash va normativ-huquqiy hujjatlar loyihalarini lingvistik ekspertizadan o‘tkazish choralarini ko‘radi.
Davlat tili bo‘yicha maslahatchilarga yangi vazifalar yuklatildi
Vazirlar Mahkamasining 2026-yil 7-avgustdagi 437-sonli qarori bilan mamlakatda davlat tilida ish yuritishni samarali tashkil etishga qaratilgan qo‘shimcha chora-tadbirlar belgilandi. Ushbu hujjat Prezidentning 2025-yil 20-oktabrdagi qarorida ko‘rsatilgan vazifalarni bajarishni ta’minlashga yo‘naltirilgan.
Qarorda qayd etilishicha, respublika darajasidagi davlat organlari va xo‘jalik birlashmalarining markaziy apparatlarida, Qoraqalpog‘iston Respublikasi Vazirlar Kengashida, viloyatlar, Toshkent shahri hamda tuman va shahar hokimliklarida rahbarning ma’naviyat va davlat tili masalalari bo‘yicha maslahatchisi lavozimi joriy etilgan.
Maslahatchilar faoliyatini Vazirlar Mahkamasining Davlat tilini rivojlantirish departamenti muvofiqlashtiradi va ularga uslubiy rahbarlik qiladi. Maslahatchi Departament bilan kelishilgan holda tegishli davlat organi yoki tashkiloti rahbari tomonidan lavozimga tayinlanadi va ozod etiladi. Ular o‘z rahbari hamda Departamentga hisobdor bo‘ladi.
Maslahatchilarning asosiy vazifalari qatoriga davlat tili, geografik ob’yektlar va ma’naviy-ma’rifiy sohaga oid qonunchilik hujjatlariga rioya etilishini ta’minlash kiritildi. Shuningdek, ular davlat tili qoida va me’yorlariga amal qilinishi hamda normativ-huquqiy hujjatlar loyihalarini lingvistik ekspertizadan o‘tkazish choralarini ko‘radi.
Qarorga muvofiq, davlat organlari va tashkilotlarida davlat tili to‘g‘risidagi qonunchilik talablariga rioya etilishi, jumladan, hujjatlarning davlat tilida yuritilishi uchun tashkilot rahbarlari mas’ul va shaxsan javobgar hisoblanadi.