AQSH fuqarolarini Yaqin Sharq davlatlarini tark etishga chaqirdi
AQSH Yaqin Sharqdagi fuqarolarini mintaqani tark etishga chaqirdi
1-avgust kuni Yaqin Sharq poytaxtlaridagi AQSH elchixonalari Amerika fuqarolarini mintaqaviy urushning "kutilmagan keskinlashuvi"dan ogohlantirib, ularni hududni tark etishga tayyor turishga undadi. Bu haqda Arab News xabar berdi.
Bahrayn, Iroq, Isroil, Iordaniya, Quvayt, Livan, Ummon, Qatar, Saudiya Arabistoni va BAA dagi AQSH elchixonalarining veb-saytlarida tegishli ogohlantirishlar e'lon qilindi. Bu xabar Qo'shma Shtatlar prezidenti Donald Trampning Eronga juda qattiq zarba berish bilan tahdid qilganidan bir kun o'tib paydo bo'ldi.
Eron va AQSH o'rtasidagi urush 28-fevraldan beri davom etmoqda. O't ochishni to'xtatish bitimidan so'ng qisqa muddatli tinchlik o'rnatilgan bo'lsa-da, zarbalar qayta tiklanishi bilan bu bitim buzildi. Besh oydan beri davom etayotgan bu urush Yaqin Sharq aholisining hayotini izdan chiqarmoqda va jahon energetika bozorlarini xavotirga solmoqda.
Xavfsizlik ogohlantirishida shunday deyiladi: "Mintaqadagi amerikaliklar hududni tark etish haqida o'ylab ko'rishi yoki vaziyat keskinlashgan taqdirda ketishga tayyor turishi kerak".
Bayonotlarda fuqarolardan reyslarni tekshirish va mahalliy hokimiyat organlarining xavfsizlik bo'yicha ko'rsatmalariga amal qilish so'raldi.
"Hozirda Yaqin Sharqda bo'lib turgan amerikaliklar ehtiyotkorlik va yuqori hushyorlikni saqlashi kerak. Shuningdek, ular parvozlarning bekor qilinishi, havo hududining vaqtincha yopilishi va ehtimoliy kechikishlarga tayyor turishi lozim", deyiladi xabarda.
Iordaniyadagi amerikaliklarga yaqinda Eron raketalari hujumiga uchragan AQSH harbiy bazalariga bormaslik uqtirildi. Isroildagi fuqarolarga esa eng yaqin bombapanoh joylashgan manzilni bilib olish tavsiya etildi.
AQSHning Quddusdagi elchixonasi saytida berilgan xabarda shunday deyiladi: "Eron rejimining xatti-harakatlarini oldindan aytib bo'lmaydi. Buni uning yaqinda mintaqadagi hududlarga ogohlantirishsiz hamda hech qanday sababsiz zarba bergani va hujum ko'lamini ilgari nishonga olinmagan hududlarga (masalan, Misrga) kengaytirganidan ko'rish mumkin".
"Himoya qalqoni"
Eron harbiylari 1-avgust kuni Vashingtonni mintaqada tinchlikni keskinlashtirishda aybladi.
Eron harbiy markaziy qo'mondonligi rahbari Ali Abdullohiy davlat televideniyesida o'qib eshittirilgan bayonotida shunday dedi: "Jinoyatchi va tajovuzkor Amerika uchun himoya qalqoni vazifasini o'tayotgan har qanday mamlakat urush alangasida yonadi".
Eron oliy rahnamosining maslahatchisi Muhammad Muxbir ham Eron infratuzilmasiga qilinadigan har qanday hujumdan ogohlantirdi.
U X'dagi sahifasida shunday yozdi: "Siz harbiy hisob-kitoblarga tayanib ish qilasiz. Biz esa tarix mantig'i bilan javob beramiz. Eron infratuzilmasiga hujum qilish sizning 250 yillik hukmronligingiz poydevorini larzaga keltiradi".