Зеленскийнинг ўрнини эгаллаши мумкин бўлган 4 номзод номи айтилди
Нашр ушбу рўйхатни АҚШ президентининг Украинада янги сайлов ўтказишга чақириғи фонида тузган.
Зеленскийнинг ўрнини босиши мумкин бўлган 4 номзод номи тилга олинди
Невсвеек (АҚШ) янгиликлар журнали Украинанинг кейинги президенти лавозимига даъвогарлик қилиши эҳтимоли бор бўлган тўрт сиёсатчининг номини эълон қилди.
Нашр бу рўйхатни АҚШ президентининг Украинада янги сайлов ўтказишга чақириғи фонида шакллантирди.
Валерий Залужний. Украина Қуролли Кучларининг собиқ бош қўмондони, ҳозирда Украинанинг Буюк Британиядаги элчиси;
Кирилл Буданов. Украина ҳарбий разведкасининг (ГУР) собиқ раҳбари, ҳозир Украина президенти офиси раҳбари;
Михаил Фёдоров. Рақамлаштириш ва собиқ мудофаа вазири. Ҳозир истеъфода;
Пётр Порошенко. Украинанинг бешинчи президенти, мухолифатдаги «Европа бирдамлиги» партияси етакчиси.
10-октабр куни АҚШ етакчиси Доналд Трамп Украинада янги сайлов ўтказишни таклиф қилди ва Володимир Зеленскийни АҚШга зарар етказмоқчи бўлишда айблади.
«Мен келишув туза оладиган янги етакчини топишни таклиф қиламан. Чунки у кўплаб битимлар тузиши мумкин эди, аммо негадир ҳеч қачон бундай қилмади», - деди АҚШ етакчиси.
Эртаси куни Зеленский АБС Невс телеканалига берган интервюсида, агар Россия 60 кунга ўт очишни тўлиқ тўхтатишга рози бўлса, Украина президентлик сайловини ўтказишга тайёрлигини айтди. Кремл эса буни рад этиб, фақат сайлов куни ҳужумларни тўхтатишга тайёрлигини билдирди.
Украинада президентлик сайлови 2024-йил март ойи охирида бўлиб ўтиши керак эди, бироқ ҳарбий ҳолат жорий этилгани сабабли ўтказилмади. Ўша йилнинг май ойида Зеленскийнинг беш йиллик ваколат муддати якунланди. Шундан бери Москва уни нолегитим президент деб ҳисоблаб келади.
Европа Иттифоқи, БМТ ва АҚШ Давлат департаменти эса ваколат муддати тугаганига қарамай, Зеленскийни президент сифатида тан олишда давом этмоқда.