Зеленский Украинада сайлов ўтказиш учун шартини айтди
У Путин 60 кунлик оташкесимга рози бўлишини сўрамоқда.
Зеленский Украинада сайлов ўтказиш учун шартини маълум қилди
Агар Владимир Путин 60 кунлик сулҳга рози бўлса, Украинада сайловлар ўтказилади, деди Володимир Зеленский АБС Невс журналисти Жонатан Карлга берган интервюсида.
Зеленский АҚШ президентининг Украинага янги етакчи кераклиги ҳақидаги гапларига жавобан, қачон сайлов ўтказиш ва кимни сайлаш масаласини украинларнинг ўзи ҳал қилиши кераклигини таъкидлади.
«Президент Трамп айтдики, бизга – Украинага – янги президент керак. Президент Трампга ҳурматни сақлаган ҳолда айтаманки, етакчини сайлаш – бу бизнинг жамиятимизнинг, халқимизнинг иши. Ҳа, биз уруш ҳолатидамиз ва сайловлар ўтказиш чиндан ҳам жуда қийин», – деди Зеленский АБС эфирида.
Унинг айтишича, гап фақат Украина қонунчилиги уруш даврида сайловлар ўтказишни тақиқлашида эмас, балки ҳозир одамларга овоз бериш имконини берадиган хавфсизлик инфратузилмаси ҳам йўқлигида.
«Агар президент Трамп чиндан ҳам сайловлар орқали ўзгаришлар бўлишини хоҳласа – мен бу ҳақда унинг жамоасига ҳам айтганман – улар Путинга етказишсин: бизга икки ой, нафас ростлаш учун 60 кун муҳлат берилсин. Ўт очиш 60 кунга тўлиқ тўхтатилсин – ва биз сайловларни ташкиллаштирамиз. Албатта, биз халқимизнинг – айнан украин халқининг ҳар қандай танловини қабул қилишга тайёр бўламиз», – дейди Зеленский.
Бир кун аввал Трамп журналистлар билан суҳбатда Украинага «келишув туза оладиган янги президент сайлаш»ни таклиф қилганди.