Зеленский унинг самолёти Молдовада бўлганида Россия икки марта дрон учирганини айтди

Зеленский унинг самолёти Молдовада бўлган пайтда Россия икки бор дрон учирганини айтди

Украина президенти Владимир Зеленский унинг самолёти Молдова ҳаво ҳудудида эканида Россия икки марта дрон учирганини маълум қилди.

“Менинг президентлик самолётим Молдовада эди ва шунинг учун улар Молдовага ҳужум қилди. Улар Молдова ҳаво ҳудудидан фойдаланди. Балки шахсан менга ҳужум қилишни хоҳлашмагандир... Биз бу ҳақда оммавий ахборот воситаларига хабар бермадик, лекин Кишинёв орқали уйга (Украинага) қайтар чоғимизда улар яна шундай қилди”, деди Зеленский.

Журналистнинг Москва шу йўл билан Украина президентини қўрқитишга уринганми, деган саволига Зеленский ижобий жавоб берди. Президент бу гапларни Россия дрони 13-сентябр куни Украинадан Полшага кетаётган поездга зарба бергани ҳақидаги саволга жавобан айтди.

Ҳужумга учраган поезд ёнида Полшага европалик дипломатларни олиб кетаётган махсус поезд ҳам бўлган. Унда Буюк Британиянинг собиқ бош вазири Борис Жонсон ва Германия канслерининг энг яқин маслаҳатчиларидан бири Гюнтер Заутер ҳам бор эди.

Зеленскийнинг айтишича, Россия поездда “европалик ва америкаликлардан иборат катта делегация” борлигини билган.

“Ва улар ҳужумни амалга оширган. Улар бундай ҳаракатларни Молдова, Руминия ва баъзан Полшада ҳам қилган. Бу давомли жараён. Улар шу тариқа кучини кўрсатади ва сиз ҳеч ким бунга жавоб қайтармаслигини тушунасиз”, деди Зеленский.

Украина президенти самолёти дрон билан тўқнашишига бир баҳя қолди

9-сентябр куни Норвегия бош вазири Ёнас Гар Стёре президент самолёти Молдовадан Ослога учаётганда дрон билан тўқнашиб кетишига оз қолганини айтди. Зеленский 8-сентябр куни кечқурун қирол Ҳаралд В нинг дафн маросимида қатнашиш учун Молдовадан Ослога келган. Маросимдан кейин Украина президенти Ёнас Гар Стёре билан учрашган.

Молдова Либера нашрининг ёзишича, мамлакат ҳаво ҳудудида дрон борлиги ҳақидаги сигнал соат 16:30 да олинган. Соат 17:20 дан кейин дрон Кишинёв аеропортидан тахминан 160 километр узоқликдаги Ришкан туманидаги қишлоқ яқинида портлаган. Шундан сўнг ҳаво парвозига қўйилган чекловлар олиб ташланган ва Зеленскийнинг самолёти учиб кетган. АФП агентлигининг Украина президенти офисидаги манбаси Норвегия бош вазирининг самолёт дрон билан тўқнашишига оз қолгани ҳақидаги баёнотини “муболаға” деб атади.