Зеленский: Путинга урушни янада ёйиш имконини бермаслик керак
Украина президенти Володимир Зеленский БМТ Бош Ассамблеясидаги нутқида Россия президенти Владимир Путинни дунё бўйлаб уруш ғоясини тарқатаётган «нолинчи бемор» деб атади. У Россиянинг урушни молиялаштириш имкониятини чеклаш зарурлигини таъкидлаб, Украина энергетикасига ҳужумлар давом эца, жавоб зарбалари берилиши мумкинлигини билдирди.
Зеленский: Путинга урушни янада кенгайтириш имконини бермаслик керак
ДВ хабарига кўра, Зеленский 23-сентабр куни Ню-Ёркда бўлиб ўтган БМТ Бош Ассамблеяси йиғилишида нутқ сўзлаган.
Украина президентининг айтишича, Путиндан тарқалаётган уруш ғояси қаерга бориб етмасин, «фақат оғриқ, беқарорлик, янги хатарлар ва, албатта, янги инқирозларни» юзага келтирмоқда.
«Унинг ҳаракатларига йўл қўймаслик ва бу ёвузликни янада тарқатиш имконини бермаслик керак», - деган Зеленский.
Зеленский Россия нефт саноати тарихда илк бор «сўнгги кучини сарфлаб» ишлаётганини даъво қилди. У буни БМТ Хавфсизлик Кенгашида доимий ўринга эга ва нефт экспорти билан фахрланадиган мамлакат учун оғир мағлубият деб баҳолади.
Шу билан бирга, Украина президенти нефт, бензин, дизел ёнилғиси, заводлар ёки портларнинг ўзи Киевнинг асосий мақсади эмаслигини таъкидлади.
«Бизнинг нишон - Россиянинг бу урушни молиялаштириш ва чўзиш қобилияти», - деди у.
Зеленскийнинг билдиришича, Россия Украинанинг энергетика ва иситиш тизимларига ҳужумларни давом эттирса, Киев бу қишда Россиянинг «генерал Аёз»и «бошқа томонга ўтиши» учун ҳаракат қилади. У шу тариқа Россия энергетика обьектларига жавоб зарбалари берилиши мумкинлигига ишора қилди.
Зеленскийнинг келтиришича, январ–август ойларида Россия қуролли кучларининг Украинадаги жанг майдонидаги шахсий таркиб йўқотишлари 248 964 кишини ташкил этган.
«Путин ҳар бир километр учун 248 киши билан тўлаяпти. Ҳали ҳам уни ақл билан иш тутаётган деб ҳисоблайдиганлар борми?» - деди Украина президенти.
Унинг сўзларига кўра, Россия армияси сафида яна 47 мамлакат фуқаролари ҳам жанг қилмоқда ва улар ҳам жанг майдонида ҳалок бўлмоқда.
Зеленский келаси йилнинг ўзидаёқ жанг майдонида қарорларни фақат одамлар эмас, сунъий интеллект ҳам қабул қила бошлаши эҳтимоли борлигидан огоҳлантирди.