Зара Ларссон Оқ уйни депортация ҳақидаги видеода унинг қўшиғидан фойдалангани учун қаттиқ қоралади
Оқ уй санъаткор ушбу видеони «инсонийликдан йироқ» деб атаганидан кейин Ларссоннинг «Midnight Sun» қўшиғини ўз роликларидан биридан олиб ташлади.
Зара Ларссон Оқ уйни депортация ҳақидаги видеода унинг қўшиғидан фойдалангани учун танқид қилди
Ларссон Оқ уй унинг трекидан «инсонийликдан йироқ» хабарларни тарқатиш учун фойдаланганини айтди
Швециялик поп-юлдуз Зара Ларссон Оқ уйни ижтимоий тармоқдаги қисқа видеода (reel) унинг энг машҳур қўшиқларидан бирини ишлатгани учун қоралади.
Ушбу роликда иммиграция қонунчилигини бузганларни ҳибсга олиш рейдлари тасвирланган видеода Ларссоннинг «Midnight Sun» қўшиғидан фойдаланилган. Шундан сўнг қўшиқ постдан олиб ташланди, бироқ видео Оқ уйнинг TikTok саҳифасида қолмоқда.
Видеода Ларссоннинг «never-ending midnight sun» (тугамайдиган ярим тун қуёши) сатрига ҳамоҳанг тарзда «never ending deportations» (тугамайдиган депортациялар) деган ёзув қолдирилган.
Ижтимоий тармоқларда жойлаштирилган уч дақиқалик жавоб видеосида Ларссон ушбу роликни «инсонийликдан йироқ» деб атади ва Трамп маъмуриятига ўз мусиқаларидан фойдаланмасликни айтган Сабрина Карпентер ва Ариана Гранде каби хонандалар сафига қўшилди.
Роликда Иммиграция ва божхона назорати (ICE) агентлари, шунингдек, АҚШнинг бошқа ҳуқуқ-тартибот идоралари ходимлари эркакларни қўлларига кишан тақиб, машиналарга ўтказаётгани акс этган бир нечта видеолар бирлаштирилган.
Ларссон асл роликнинг бир қисмини қайта жойлаштирди, унда видео унинг пешонасига бармоқлари билан «L» шаклини кўрсатиб тушган селфи-видеосига уланиб кетади.
TikTok’да аллақачон 4,2 миллиондан ортиқ кўрилган ушбу муносабат видеосида у ўз обуначиларига Оқ уйнинг видеоси «жуда инсонийликдан йироқ» эканини айтади.
Ларссон сўзида давом этади: «Ушбу видеодаги одамлар — ҳақиқий одамлардир».
«Ҳужжатсиз бўлган бу одамларнинг мутлақ кўпчилиги иш жойига эга оддий одамлар бўлиб, улар шунчаки яхшироқ келажакка интилишмоқда».
«Ҳамма нарсанинг шунчалик мемга айлантирилгани ва «ҳа-ҳа-ҳа» қилиб юборилгани жуда ақл бовар қилмас ҳолат», дейди у Оқ уйни ўз қўшиғидан «бўлиниш» яратиш учун фойдаланганликда айблаб, ваҳоланки, Ларссоннинг сўзларига кўра, қўшиқ матни инсонлар ва табиат ўртасидаги боғлиқликни ифодалайди.
Шу йил бошида Ларссон Президент Дональд Трампнинг унинг «Lush Life» хити остида турли тадбирларда рақсга тушгани акс этган видеосини ҳам танқид қилган эди.
Оқ уйнинг ижтимоий тармоқлардаги аккаунтлари санъаткорларнинг аралашувидан сўнг ўз саҳифаларидан бир қатор қўшиқларни олиб ташлашга мажбур бўлди.
Тейлор Свифтнинг мавсумий «August» треки август ойида Трамп маъмурияти томонидан жойлаштирилган роликдан олиб ташланди, Оливия Родригонинг қўшиқларидан бири эса хонанда ундан фойдаланишни «нафратли тарғибот» деб қоралаганидан кейин видеодан ғойиб бўлди.
Ариана Гранде ҳам Оқ уй уларнинг қўшиқлари акс этган видеоларни жойлаштирганидан сўнг, Трамп маъмуриятини ижтимоий тармоқлардаги контентларда ўз мусиқаларидан фойдаланмаслик ҳақида алоҳида огоҳлантирган.