“Ерингиз тугул, жонингизни суғуриб оламан” – Пискент ҳокими фермерларга босим ўтказди
Туман ҳокими Музаффар Арипов фермерларга ерини тортиб олишини айтиб, босим қилган. Залда туман прокурори ва ИИБ бошлиғи ҳам бўлган. Фермерлар йиғилишга телефонлари олиб қўйилган ҳолда киритилган.
“Ерингиз тугул, жонингизни суғуриб оламан” – Пискент ҳокими фермерларга босим ўтказди
Kun.uzъга Пискент тумани ҳокими Музаффар Арипов ўтказган йиғилишдан ёзиб олинган аудио келиб тушди. Аёллар ҳам қатнашган йиғилишда ҳоким айрим фермерларни ҳақорат қилгани айтилмоқда.
Йиғилиш туманда картошка экиш масаласига бағишланган эди. Музаффар Арипов фермерларни рўйхат бўйича турғизиб, уларга босим ўтказган.
“Эртага ерингизни олиб қўйсам, кейин кўраман. Мен фермерларга тушунмайман-да, битта айтган топшириқни қилиб қўйинг. Охири мажбур қилади мени ерини олишимга. Кейин эшигимнинг тагида ётади итга ўхшаб. Ялинади”, деган ҳоким.
Шунингдек, у фермерларга “ҳазиллашмасликни, ўйнашмасликни, ери нарида турсин, жонини суғуриб олишини” айтган.
“Бир нечта аёллар ҳам бор эди. Ҳоким жуда ҳаддидан ошди, чидаб бўлмас даражада ҳақоратлади. Энди шу фирмадан картошка олмаганларни прокурор билан қўрқитиб, ерини олиб қўйишга ҳаракат қиляпти. Умуман ишлаб бўлмай қолди. Ҳозир буғдой экиш керак, шунгаям тўсқинлик қиляпти”, деди йиғилишда бўлган фермерлардан бири Kun.uzъга.
Музаффар Арипов йиғилиш давомида бир неча бор ҳақоратли сўзларни ишлатган. Фермерлар залга телефонлари олиб қўйилган ҳолда киритилгани айтилмоқда.
Kun.uz манбасининг айтишича, ушбу йиғилиш шу йил 18-июл куни буғдойдан бўшаган ерларга иккинчи экин экиш тадбирлари бўйича ўтказилган.
41 ёшли Музаффар Арипов 2024-йил апрелидан буён Пискент туманига раҳбарлик қилиб келмоқда. Бунгача у Тошкент вилояти ҳокимлиги Ташкилий-кадрлар гуруҳи раҳбари лавозимида фаолият олиб борган.