ЕИ Украинага дрон ва ракеталар хариди учун қўшимча маблағ ажратади
Европа Иттифоқи октабр ўрталарида Украинага дронлар ва ракеталар сотиб олиш учун қўшимча маблағ ажратади. Еврокомиссия раҳбари Урсула фон дер Ляен бу ёрдам Украина мудофааси ва ҳаво ҳудудини ҳимоя қилишни кучайтиришга қаратилганини билдирди.
ЕИ Украина учун дрон ва ракеталар харидига қўшимча маблағ ажратади
ДВ маълумотига кўра, фон дер Ляен 11-октабр куни Украина президенти Володимир Зеленский билан телефон орқали суҳбатлашган ва Х ижтимоий тармоғида қўшимча молиялаштириш ҳақида хабар берган. У маблағнинг аниқ миқдорини ҳам, унинг қайси манбалардан ажратилишини ҳам ошкор қилмаган.
Украинадаги вазият шу ҳафта ўтказиладиган Европа кенгаши йиғилишининг асосий мавзуларидан бири бўлади. Унда келгуси йил учун молиявий эҳтиёжлар ва янги халқаро кўмакни жалб қилиш йўллари муҳокама қилиниши режалаштирилган.
Еврокомиссия раҳбари, шунингдек, Украинанинг ЕИга қўшилиши бўйича музокараларда яна иккита мавзулар кластерини очишга тўсқинлик қилаётган муаммолар бартараф этилишини билдирган.
Фон дер Ляен Зеленскийнинг ўт очишни тўхтатиш ҳақидаги чақирувини тўлиқ қўллаб-қувватлашини ҳам айтган. Унинг таъкидлашича, бундай келишув жаҳон озиқ-овқат таъминоти ҳамда Украина ва Россия энергетика инфратузилмасини ҳимоя қилишга ёрдам бериши мумкин.
Еврокомиссия раҳбари уруш янада оғир босқичга кирганини қайд этган. У Россияни фронтда узоққа чўзилган уруш олиб бориш билан бирга, фронт чизиғидан анча узоқдаги тинч аҳолига зарба беришда айблаган.
Аввалроқ, 2-октабр куни Еврокомиссия Украинага Украине Фасилитй механизми доирасида 2,9 миллиард евролик навбатдаги траншни ажратишни маъқуллаган эди. Бу дрон ва ракеталар учун эълон қилинган янги маблағдан алоҳида, узоқ муддатли молиявий кўмак механизмига тегишли қарор.
Украине Фасилитй 2024–2027-йилларга мўлжалланган бўлиб, шу даврда Украинага 50 миллиард еврогача барқарор молиявий ёрдам тақдим этишни назарда тутади.
Ушбу механизм бўйича тўловлар Украинанинг тикланиш ва ислоҳотлар режасини бажариши, демократик институтлар, қонун устуворлиги ва инсон ҳуқуқларини таъминлаши билан боғлиқ. Маблағлар белгиланган шартлар бажарилгани текширилгандан сўнг ҳар чоракда ажратилади.