Японияда декрет таътилига чиққан илк мэр TIME100 Next рўйхатидан жой олди
Шоко Каватанинг декрет таътили туғилиш даражасини оширишга ҳаракат қилаётган Японияда турлича муносабатларга сабаб бўлди.
Японияда декрет таътилига чиққан илк мэр TIME100 Next рўйхатига кирди
Японияда декрет таътилига чиққан биринчи мэр Шоко Кавата TIME журнали томонидан энг нуфузли 100 та янги чиқиб келаётган юлдузлардан бири сифатида танланди.
Ушбу шарафли эътироф 36 ёшли мэр 15 сентябрь куни ўзининг биринчи фарзандини дунёга келтирганидан бир неча ҳафта ўтиб эълон қилинди.
Шу йил бошида Киото префектурасидаги Явата шаҳри мэри бўлиб ишлайдиган Кавата сайланган расмийларга фарзанд туғилиши муносабати билан таътил берилиши керакми-йўқми деган умуммиллий муҳокамалар марказига айланган эди.
Унинг декрет таътилига чиқиш қарори туғилиш даражасини оширишга ҳаракат қилаётган Японияда ҳам олқишларга, ҳам танқидларга сабаб бўлди.
Ижтимоий тармоқларда баъзилар болали бўлиш қийинлигини ва Кавата қўлидан келганини қилаётганини айтишди. Бир шарҳловчининг таъкидлашича, Япония жамияти ҳомиладорликни ҳисобга олган тизимларни ярата олмаган. Бошқа биров эса Кавата оиласини биринчи ўринга қўйиб, бошқа аёлларнинг сиёсатга киришини осонлаштириш орқали ажойиб ўрнак кўрсатаётганини айтди.
Бироқ, танқидчилар давлат вазифаларидан узоқлашишни «масъулиятсизлик» деб аташди ва агар Кавата ҳомиладор бўлишни хоҳлаганида «буни лавозимга киришишдан олдин қилиши керак эди» деб таъкидлашди. Яна бир киши узоқ муддатли таътилга чиқмоқчи бўлган юқори лавозимли амалдорлар «истеъфога чиқиши керак» деган фикрни билдирди.
Бошқалар эса декрет таътили пайтида иш ҳақи камайтирилиши кераклигини айтишди.
Туғишдан олдин BBC’га берган интервьюсида Кавата танқидларни рад этиб, ўз ишини яхши кўришини ва ҳозир фарзанд кўриб, оила қуриш учун энг тўғри вақт эканлигига ишонишини фахр билан айтди.
«Агар биз декрет таътилига чиқаётган сиёсатчиларни танқид қиладиган бўлсак, бу 20 ёшдан 40 ёшгача бўлган барча аёлларни — ҳомиладор бўлишга қодир аёлларни давлат лавозимларидан амалда четлаштираётганимизни англатади», деди у.
Японияда шаҳар хизматчилари учун декрет таътили кўзда тутилган бўлса-да, ҳозирда маҳаллий сайланган расмийлар учун бундай ҳуқуқий асос мавжуд эмас. Шу сабабли Кавата ўз идораси билан биргаликда режа ишлаб чиқди. У ўз ваколатларини 16 ҳафтага мэр ўринбосари Шигето Носега топширди ва имкон қадар масофадан туриб ишлашни давом эттирди.
15 сентябрь куни мэр Кавата қиз фарзандли бўлганини эълон қилди.
У ўзини қўллаб-қувватлаганларга миннатдорчилик билдирди ва бутун мамлакат бўйлаб ижтимоий муаммоларни ҳимоя қилиш мақсадини яна бир бор тасдиқлади.
«Олдинда турган сон-саноқсиз қийинчиликларга дуч келар эканман ва ота-она бўлиш аслида нима эканлигини англаб етар эканман, мен ушбу тажрибаларни ўзим олиб бораётган сиёсатда реал вақт режимида акс эттирмоқчиман», деб ёзди у.
«Мен бугунги кунда ота-оналар ва болалар дуч келаётган кўплаб муаммоларга худди шу нуқтаи назардан, уларни ўзи бошидан кечираётган инсон сифатида қарашни ва биргаликда қандай қилиб олдинга йўл топишимиз мумкинлиги ҳақида ўйлашни хоҳлайман».