Япония пиво гигантлари нархларни келишиб олиш картелида айбланиб, тинтув қилинди
Asahi ва Kirin компаниялари Япония рақобат қўмитаси томонидан ўз биноларида тинтув ўтказилганини тасдиқлади.
Япониянинг пиво ишлаб чиқарувчи йирик компанияларида нархларни келишиб олиш картелида гумонланиб тинтув ўтказилди
Япония расмийлари мамлакатнинг энг йирик пиво ишлаб чиқарувчилари ўз ичимликлари нархини оширишни ўзаро мувофиқлаштирганликда гумонланиб, уларнинг офисларида тинтув ўтказди.
Asahi ва Kirin компаниялари BBC’га Япония Адолатли савдо комиссияси томонидан уларнинг биноларида тинтув ўтказилганини тасдиқлади ва давлат органи билан тўлиқ ҳамкорлик қилишларини билдирди.
Шунингдек, Sapporo Breweries ва Suntory Spirits компанияларида ҳам тинтувлар ўтказилгани ҳақида хабарлар бор. Иккала компанияга ҳам изоҳ олиш учун мурожаат қилинган.
Чоршанба куни тергов ҳақидаги хабарлар пайдо бўлганидан кейин Asahi, Kirin ва Sapporo акциялари арзонлашди. Suntory биржада рўйхатга олинмаган.
Japan Times нашрининг ёзишича, тергов компанияларнинг ўтган йилнинг апрель ойида ва 2022 йилнинг октябрь ойида нархларни оширганига қаратилган.
Тўрттала фирма ҳам хомашё нархининг ошиши ва бошқа омиллар, жумладан, энергия ва транспорт харажатларини рўкач қилиб, нархлар ошишини эълон қилган эди.
Kirin Holdings компаниясининг маълум қилишича, унинг шўъба корхонаси — Kirin Brewery Company «Монополияга қарши қонунни бузганликда гумон қилиниб» тинтув қилинган.
Компания бу масалага «жуда жиддий» ёндашаётганини таъкидлаб, «Япония Адолатли савдо комиссиясининг тергови ва ҳамкорлик бўйича ҳар қандай сўровлари билан тўлиқ ҳамкорлик қилишини» қўшимча қилди.
Kirin Holdings шундай деди: «Ҳозирги вақтда ушбу масаланинг компаниянинг молиявий натижаларига таъсири аниқланмаган. Компания ҳар қандай муҳим ўзгаришларни тезкорлик билан ошкор қилади».
Asahi Breweries компанияси «Хусусий монополлаштиришни тақиқлаш ва адолатли савдони таъминлаш тўғрисидаги қонунни бузганликда гумон қилиниб, Япония Адолатли савдо комиссияси томонидан тергов қилинаётганини» маълум қилди.
Унда шундай дейилган: «Биз комиссия билан тўлиқ ҳамкорлик қиламиз».