Янги Тошкентда йил охиригача 20 мингта турар жой уйини фойдаланишга топшириш режалаштирилмоқда
Янги Тошкентда 2026 йил охиригача камида 70 минг кишига мўлжалланган 20 мингта турар жой уйларини фойдаланишга топшириш кўзда тутилган. Бундан ташқари, шаҳарда 55 минг томошабинга мўлжалланган стадион ҳамда вазирлик ва идоралар учун янги бинолар барпо этилмоқда.
Бу ҳақда Президент Шавкат Мирзиёевнинг қурилаётган шаҳарга ташрифи чоғида маълум қилинди.
Президент матбуот хизматининг хабар беришича, давлат раҳбари Янги Тошкентнинг ривожланиши зарур инфратузилмани — спорт ва савдо объектларидан тортиб таълим ва тиббиёт муассасаларигача бўлган инфратузилмани яратиш билан параллель равишда амалга оширилиши кераклигини таъкидлади.
Энг йирик объектлардан бири FIFA талабларига жавоб берадиган 55 минг ўринли стадион бўлади. Келаси йили у 20 ёшгача бўлган футболчилар ўртасидаги жаҳон чемпионатининг асосий ареналаридан бирига айланади.
Аҳоли сонининг ортишини ҳисобга олган ҳолда меҳмонхоналар, қаҳвахоналар, ресторанлар ва кўнгилочар масканларга бўлган эҳтиёжни аниқлаш зарур. Президент ушбу йўналишларни ривожлантириш бўйича таклифлар тайёрлашни топширди.
Бир вақтнинг ўзида давлат органларини Янги Тошкентга кўчириш ишлари давом этмоқда. Ҳозирда Қурилиш, Транспорт ва Энергетика вазирликлари енгил конструкцияли биноларда жойлашган. Бундан ташқари, вазирлик ва идораларнинг 2,6 минг нафар ходими учун тўққизта бино қурилмоқда.
Бош вазирга қолган вазирлик ва давлат ташкилотларининг Янги Тошкентга кўчиб ўтишини ташкил этиш топширилди.
Пойтахтдаги давлат органларининг амалдаги биноларини сақлаб қалиш ва зарур таъмирлаш ишларини олиб бориш шарти билан сотиш режалаштирилмоқда. Уларни бузиш ва реконструкция қилишга йўл қўйилмайди.
Аввалроқ Шавкат Мирзиёев Янги Тошкентга ташрифи чоғида шаҳар қурилишини жадаллаштириш ва хусусий инвестицияларни фаолроқ жалб этиш зарурлигини таъкидлаган эди. Унинг сўзларига кўра, бизнеснинг лойиҳадаги иштироки суръатлари ҳозирча мавжуд имкониятларга мос келмаяпти.