Яман раҳбари ҳусийчилар ҳужуми фонида сафарбарликка чақирди
Яман Президентлик раҳбарлик кенгаши раиси Рашад ал-Алимий ҳусийчилар билан можаро кескинлашгани сабабли фуқароларни сафарбарликка ва ҳукумат қўшинлари сафига қўшилишга чақирди. У ҳусийчилар сафини тарк этиб, ҳукумат томонига ўтадиганлар яқинлашиб келаётган амнистия доирасида афв этилишини билдирди.
Яман раҳбари ҳусийчилар ҳужуми шароитида сафарбарликка чақирди
ДВ хабарига кўра, ал-Алимий 25-сентабр, жума куни мамлакат аҳолисига мурожаат қилиб, фуқароларни Яман мудофаасига ҳисса қўшишга ундаган.
Мурожаат Эрон томонидан қўллаб-қувватланадиган ҳусийчилар билан давом этаётган можаро янада кескинлашган паллада янгради. Бир неча ҳафта аввал ҳусийчилар ҳукумат қўшинларига зарбалар берган. Нашр ёзишича, Саудия Арабистони ҳарбий авиацияси кўмагига қарамай, Яман армияси чекинишда давом этмоқда.
ДВ маълумотига кўра, сўнгги ойларда ҳусийчилар Яманнинг Қизил денгиз бўйидаги бутун қирғоғини, шунингдек, Боб ал-Мандаб бўғозига туташ ҳудудларни эгаллаган.
Нашр қайд этишича, АҚШ ва Исроилнинг Эронга қарши уруши бошланганидан бери ушбу бўғознинг стратегик аҳамияти ошган. У Ҳормуз бўғози блокадаси сабаб нефт етказиб беришда юзага келган узилишларни қисман қоплаш имконини берувчи муқобил савдо йўли сифатида ишлатилмоқда.
Мақолада ҳусийчиларнинг ҳарбий ютуқлари Эрон ва унинг иттифоқчиларига минтақадаги муҳим сув йўллари устидан назоратни мустаҳкамлаш имконини бергани таъкидланган. Бу Саудия Арабистони ва Форс кўрфазидаги бошқа давлатларнинг жаҳон бозорига нефт экспортига таъсир кўрсатмоқда. Исёнчилар ҳужумлари халқаро савдо йўлларига таҳдид солиб, электр энергияси нархлари ошишига ҳам туртки бермоқда.
Реутерс хабарига кўра, ҳусийчиларнинг олдинга силжишига Эрон Ислом инқилоби муҳофизлари корпуси раҳбарлик қилмоқда. Агентликнинг Теҳрондаги манбалари Эрон шу йўл билан АҚШга қарши қарама-қаршиликда янги фронт очишга интилаётганини айтган.
Яманда 2014-йилдан бери фуқаролар уруши давом этмоқда. Можаро мамлакатнинг амалда ўзаро курашаётган уч томон ўртасида бўлиниб кетишига олиб келган.
Ҳусийчилар мамлакатнинг шимолий ва ғарбий вилоятларини, жумладан, пойтахт Санони эгаллаган. ДВ маълумотига кўра, улар назоратидаги ҳудудларда Яман аҳолисининг қарийб 70 фоизи яшайди.
Сентабр бошида ҳусийчилар Яқин Шарқдаги ҳарбий ҳаракатларини кенгайтиришини эълон қилиб, Саудия Арабистони жанубидаги тўрт шаҳарга зарба берган. Кенг кўламли ҳужум оқибатида 70 дан ортиқ киши жабрланган, нефт обьектларида ёнғинлар чиққан.