Ядровий хавфсизлик тўғрисидаги қонун лойиҳаси Сенатга юборилди
Депутатлар давлат органларининг ваколатларини аниқлаштирувчи ҳамда саноат, радиация ва ядровий хавфсизлик талабларини бузганлик учун жавобгарликни кучайтирувчи қонун лойиҳасини қабул қилдилар.
Ядровий хавфсизлик тўғрисидаги қонун лойиҳаси Сенатга юборилди
Ўзбекистон Олий Мажлиси Қонунчилик палатаси иккинчи ўқишда саноат, радиация ва ядровий хавфсизлик соҳасидаги қонунчиликни такомиллаштиришга қаратилган қонун лойиҳасини маъқуллади.
Олий Мажлис Қонунчилик палатаси хабар беришича, ҳужжат давлат назоратини кучайтиришни, ваколатли органларнинг ваколатларини аниқлаштиришни ва қўшимча жавобгарлик чораларини жорий этишни назарда тутади.
Қонун лойиҳасида саноат, радиация ва ядровий хавфсизликни, шунингдек, атом энергиясидан фойдаланишни тартибга солувчи амалдаги қонунчиликка ўзгартиш ва қўшимчалар киритиш кўзда тутилган. Таклиф этилаётган нормалар ҳуқуқий муносабатларни янада тартибга солиш ва давлат назорати самарадорлигини оширишга хизмат қилади.
Маъмурий жавобгарлик тўғрисидаги кодексда атом энергиясидан фойдаланиш соҳасидаги норма ва қоидаларни бузганлик учун жавобгарликни белгилаш таклиф этилмоқда. Бундан ташқари, амалга оширилаётган маъмурий ислоҳотларни ҳисобга олган ҳолда, ваколатли давлат органларининг ваколатлари ва ҳуқуқий мақоми аниқлаштирилмоқда.
Шунингдек, «Атом энергиясидан тинчлик мақсадларида фойдаланиш тўғрисида»ги Қонунга айрим ўзгартишлар киритиш таклиф этилмоқда. Хусусан, юридик шахсларга нисбатан молиявий санкцияларни қўллаш имконияти назарда тутилмоқда. Бу тегишли соҳа субъектларининг масъулиятини ошириши ва белгиланган талабларга риоя этилишини кучайтириши кутилмоқда.
Иккинчи ўқишга келиб, қонун лойиҳаси депутатларнинг таклиф ва тавсиялари инобатга олинган ҳолда масъул қўмита томонидан такомиллаштирилди.
Ҳужжатни тайёрлаш жараёнида тадбиркорлик субъектларининг манфаатларини ҳисобга олган ҳолда ундан айрим нормалар чиқариб ташланди. Бундан ташқари, қатор қоидалар амалдаги қонунчиликка мувофиқлаштирилди ҳамда таҳририй ва мазмуний жиҳатдан аниқлаштирилди.
Депутатларнинг фикрича, қонун лойиҳасининг қабул қилиниши ваколатли органларнинг ваколатларини аниқроқ белгилаш, белгиланган қоидаларни бузганлик учун таъсир чораларининг мутаносиблиги ва етарлилигини таъминлаш, давлат назорати самарадорлигини ошириш ҳамда амалга оширилаётган ислоҳотлар учун ҳуқуқий асос яратиш имконини беради.
Қонунчилик палатаси томонидан маъқулланганидан сўнг, ҳужжат Олий Мажлис Сенатига кўриб чиқиш учун юборилди.