Хусийлар Қизил денгиздаги стратегик оролни қўлга киритди, дейди гувоҳлар
Исмёнчи жангчилар халқаро муҳим кема қатнови йўлида жойлашган стратегик Перим оролини қўлга киритгани хабар қилинмоқда.
Хусийлар Қизил денгиздаги стратегик оролни қўлга киритди, дейди гувоҳлар
Хусийлар ўтган ҳафтада жангларни кучайтирди ва ҳозирда Қизил денгиздаги стратегик оролни назорат остига олгани хабар қилинмоқда.
Ямандаги хусий исёнчилари Қизил денгизга кириш қисмидаги муҳим денгиз бўғзи бўлган Перим оролига етиб келишди, дейди гувоҳлар.
Орол Осиё ва Европани боғловчи ҳаётий муҳим юк ташиш йўлига дарвоза бўлиб хизмат қилувчи Боб ал-Мандаб бўғзида жойлашган.
Ҳарбий манбаларга кўра, бу воқеа хусийлар бир кун аввал Саудия Арабистони томонидан қўллаб-қувватланадиган ҳукуматпараст кучлардан стратегик Моха порт шаҳрини тортиб олганидан кейин юз берди.
Шу ҳафта бошида хусийлар халқаро кема қатновига таҳдид солмасликларини айтишди, бироқ Саудия Арабистони кемаларини нишонга олишлари ҳақидаги огоҳлантиришларини такрорлашди.
Жума куни Яман ҳукуматпараст кучлари Майюн деб ҳам аталадиган Перим оролидан чиқиб кетишди.
Гувоҳларнинг айтишича, хусий жангчилари оролга кўчиб ўтган, гарчи хусийлар томонидан бу борада зудлик билан ҳеч қандай тасдиқлов бўлмаган.
Орол Боб ал-Мандаб бўғзининг энг тор нуқтасида жойлашган бўлиб, АҚШ ва Эрон ўртасидаги можарода яна бир йирик сув йўли — Ҳурмуз бўғзи амалда ёпилганидан кейин унинг аҳамияти янада ошди.
Маҳаллий ҳукумат расмийси ва воқеа гувоҳи AFP агентлигига: "Хусийлар Боб ал-Мандаб ҳудуди ва Майюн оролини эгаллашни якунладилар", деб айтди.
Моха қўлга киритилгандан сўнг глобал кема қатновига таъсир қилиши ҳақидаги хавотирларга қарамай, хусийлар вакили Саудия кемаларидан ташқари барча юк ташиш компаниялари учун навигация хавфсиз эканини айтди.
Саудия Арабистони Осиёдаги мижозларига нефть етказиб беришда Қизил денгиз ва Боб ал-Мандаб бўғзига таянади.
Хусийлар, Яман ҳукумати ва Саудия Арабистони иштирокидаги кенгайиб бораётган можаро нефть нархининг ошишига ёрдам берди.
Хусийлар бир ҳафта олдин жануби-ғарбда ҳужум бошлаганидан бери юзлаб одамлар ҳалок бўлгани ва минглаб одамлар уй-жойини тарк этишга мажбур бўлгани хабар қилинмоқда.
Саудия Арабистони бошчилигидаги коалиция ҳукуматпараст кучларни қўллаб-қувватлаш мақсадида Яман ғарбидаги хусийлар назоратидаги ҳудудларга ҳаводан зарбалар берди, хусийлар эса Саудия Арабистони жанубидаги шаҳарлар ва нефть объектларига ракеталар ва дронлар отди.
Халқаро миграция ташкилоти (ХМТ) маълумотларига кўра, жанглар кучайганидан бери Яманда камида 46 000 киши уй-жойини тарк этган.
Жума куни ХМТ бу кўрсаткич "ҳар соатда хавотирли даражада ошиб бораётганини" маълум қилди.
Эми Поуп, ХМТ бош директори, шундай деди: "Оилалар ушбу можарода деярли ҳеч вақосиз қолиб, иккинчи ёки учинчи марта қочишга мажбур бўлмоқдалар".
Хусийлар 2015 йилда халқаро миқёсда тан олинган ҳукуматни ағдаришди, бу эса Саудия Арабистонининг фуқаролар урушига ҳарбий аралашувига сабаб бўлди. Тўрт йилдан кўпроқ вақт давомида амалда бўлган сулҳ июль ойида бутунлай бузилди.