Хитойлик эркак рафиқаси учун дунёдаги энг катта гулхайри боғини яратди

Хитойлик эркак ўз турмуш ўртоғи учун дунёдаги энг улкан гулхайри боғини бунёд этди.

Соутҳ Чина Морнинг Пост нашрининг хабар беришича, Хитойнинг Сичуан вилоятида яшовчи Чжоу Сяолин исмли шахс рафиқаси Ин Сзени хурсанд қилиш мақсадида дунёдаги энг катта гулхайри боғини яратган.

Боғни барпо этиш ғояси 2013-йилда, Ин Пекинда эри билан бирга кўрган гулхайрилар ҳақидаги болалик хотираларини эслаганида пайдо бўлган. Рафиқаси гулларни жуда яхши кўришини айтганидан сўнг, Чжоу унга атаб боғ яратишга ваъда берган.

Боғбончиликда ҳеч қандай тажрибаси бўлмаса-да, у ўз уйини сотиб, Чжуанлун шаҳридан ер сотиб олган ва гулхайри етиштиришни ўрганган. Эркак 80 гектарга яқин майдонда 700 дан ортиқ турдаги гулхайри, шунингдек, 150 мингга яқин нилуфар ва 100 минг туп хитой гибискусини ўстириш учун 10 йилдан ортиқ вақт сарфлаган.

Кейинчалик Чжоу хитойлик ботаниклардан илҳомланиб, гулхайрининг тарихи ва маданий аҳамиятини чуқур ўрганган. Ҳатто у гул турларига бағишланган расмли қўлланма ҳам тузган.

Чжоу Сяолин ва Ин Сзе 35 йилдан ортиқ вақтдан бери турмуш қуришган. Улар Ин Пекин тиббиёт университетидаги курсдошлари билан Сичуанга саёҳатга келганида танишишган. Гуруҳга стажёр-гид этиб тайинланган Чжоу қизни севиб қолган. Чжоу Пекинга келиб, Инга турмуш қуришни таклиф қилгунига қадар улар беш йил давомида дўст сифатида хат ёзишиб туришган.