Хитойда фарзандини 13 йил энага қарамоғида қолдирган жуфтлик ота-она мақомидан маҳрум этилди
Хитойда 13 йил давомида қизини энага қарамоғида қолдирган жуфтлик ота-оналик мақомидан маҳрум этилди
Хитойнинг Шанси провинсиясида суд 13 йил мобайнида қизини энага қўлида қолдирган жуфтликни ота-оналик ҳуқуқидан маҳрум қилди. Болани вояга етказган аёл эса унинг расмий васийси сифатида тан олинди, деб ёзади Вссдаилй.
Қиз 2012-йилда туғилган. Орадан кўп ўтмай, ота-онаси уни парвариш қилиш учун Чжан фамилияли энагани ёллаган. 2014-йилда эса улар болага ўзлари қарай олмаслигини билдириб, энагадан қизни вақтинча Шансидаги уйига олиб кетишни сўраган.
Энага қизни ота-онасига қайтаришга бир неча бор уриниб кўрганига қарамай, улар болани олиб кетишдан бош тортган. 2017-йилгача жуфтлик қизининг харажатлари учун вақти-вақти билан пул юбориб турган. Бироқ суд ҳужжатларига кўра, кейинчалик улар тўловларни бутунлай тўхтатган ва қизининг ҳаёти билан деярли қизиқмай қўйган.
Ҳуқуқий жиҳатдан зарур расмийлаштириш бўлмагани сабабли қиз 13 йил давомида яшаш жойи бўйича рўйхатдан ўта олмаган, мактабда тўлиқ расмий мақомга эга бўлмаган ва ижтимоий суғуртасиз қолган. Натижада у ҳатто юқори синфга кириш имтиҳонларини топшириш учун керак бўлган расмий тартиб-таомиллардан ҳам ўта олмаган.
Энага прокуратурага мурожаат қилганидан кейин унинг даъвоси қўллаб-қувватланган. Суд қиз кўп йиллар давомида Чжан билан яшаганини, унинг оиласини ўз оиласидек билишини ва шу ерда қолишни исташини аниқлади.
Шу тариқа биологик ота-она васийлик ҳуқуқидан маҳрум қилинди, энага эса қизнинг расмий васийси этиб тайинланди. Шундан сўнг маҳаллий идоралар қизга зарур ҳужжатларни расмийлаштиришда ёрдам берди.
Бундан ташқари, ота ва она болани қаровсиз қолдирганликда ҳам айбдор деб топилиб, олти ой муддатга ахлоқ тузатиш назоратига ҳукм қилинди.