Хитой технологиялари Наманган ривожланишини тезлаштирмоқда
Наманган вилояти ҳокими Шавкат Абдуразаков Хитой билан саноат, энергетика ва қишлоқ хўжалиги соҳаларида 70 дан ортиқ қўшма лойиҳалар амалга оширилаётгани ҳақида гапириб берди.
Хитой технологиялари Наманган ривожланишини тезлаштирмоқда
Наманган вилояти саноат, қишлоқ хўжалиги ва инфратузилмани ривожлантириш учун Хитой технологияларини қўллаган ҳолда Хитой билан ҳамкорликни кенгайтирмоқда. Бу ҳақда вилоят ҳокими Шавкат Абдуразаков «Синьхуа» агентлигига берган интервьюсида маълум қилди.
Вилоят раҳбари таъкидлаганидек, ҳозирда ҳудудда хитойлик ҳамкорлар билан биргаликда 70 дан ортиқ қўшма лойиҳа амалга оширилмоқда. Улар инфратузилма, қурилиш материаллари ишлаб чиқариш, яшил энергетика ва бошқа муҳим йўналишларни қамраб олган.
Қишлоқ хўжалиги ва тўқимачилик тармоғи ҳамон вилоят иқтисодиётининг асосий тармоқларидан бири бўлиб қолмоқда. Вилоятнинг маъмурий маркази, «гуллар шаҳри» сифатида танилган Наманган Ўзбекистондаги тайёр тўқимачилик маҳсулотларининг энг йирик экспортчилари қаторига киради.
Абдуразаков агросаноат мажмуини янада ривожлантириш ва замонавий қишлоқ хўжалиги технологияларини қўллашни кенгайтириш вилоятнинг устувор йўналишларидан бири эканини таъкидлади.
Сўнгги йилларда вилоятда Хитойнинг Шинжон-Уйғур мухтор регионидан етказиб берилаётган ғўза етиштириш технологиялари, яхшиланган уруғлар ва ихтисослаштирилган ўғитлар кенг тарқалди. Ҳокимнинг сўзларига кўра, улардан фойдаланиш бир гектардан олинадиган пахта ҳосилдорлигини сезиларли даражада ошириш имконини берди.
«Бу қишлоқ хўжалиги соҳамизда жиддий бурилиш бўлди», — деди Абдуразаков.
Шу билан бирга, маҳаллий фермерлар лаванда ва бошқа юқори даромадли хушбўй экинлар майдонларини кенгайтирмоқда. Бу фармацевтика, парфюмерия ва экотуризм соҳаларида ишлаб чиқариш занжирларининг ривожланиши билан бирга кечмоқда.
Энергетика соҳасида ҳам сезиларли натижалар кузатилмоқда. Наманган вилоятида Хитой компанияси томонидан қурилган қуввати 500 МВт бўлган қуёш электр станциясининг биринчи энергоблоки 2024 йилнинг декабрь ойида энерготизимга уланди. Абдуразаков таъкидлаганидек, лойиҳанинг амалга оширилиши вилоятнинг саноат зоналарида электр энергияси тақчиллигини сезиларли даражада камайтирди.
Ҳамкорликнинг алоҳида йўналиши сифатида транспорт инфратузилмаси қолмоқда. Ҳоким Тошкентни аҳоли зич жойлашган Фарғона водийси билан боғловчи Наманган вилоятининг стратегик жойлашувига тўхталиб, вилоятнинг минтақавий транспорт боғлиқлигини мустаҳкамлаш ташаббусларидаги фаол иштирокини қайд этди.
Хусусан, гап Хитой — Қирғизистон — Ўзбекистон темир йўли лойиҳаси ҳақида бормоқда. Абдуразаковнинг фикрича, янги темир йўл линияси Наманганнинг экспорт географиясини кенгайтириш ва унинг Фарғона водийси минтақавий бозорига интеграциялашувини кучайтириш имконини беради.
«Темир йўл нафақат Наманганнинг экспорт географиясини кенгайтиради, балки унинг Фарғона водийсининг янада кенгроқ минтақавий бозорига интеграциялашувига ҳам хизмат қилади», — деди у.
Ҳоким, шунингдек, Хитой корхоналарининг вилоят ривожига қўшаётган ҳиссасини алоҳида таъкидлади. Унинг сўзларига кўра, улар замонавий технологиялар ва тажриба олиб келиш билан бирга, маҳаллий аҳоли учун иш ўринлари яратмоқда.
Наманган вилояти Хитой компаниялари ва давлат органлари билан ҳамкорликни янада кенгайтиришни кутмоқда.
Абдуразаковнинг сўзларига кўра, томонлар вилоятни ривожлантириш ва ўзаро манфаатдорликни таъминлаш учун имкониятлардан биргаликда фойдаланиш ниятида.