Хитой АҚШни иккинчи ўринга суриб, дунёдаги энг қудратли давлатга айланди
Хитой АҚШни иккинчи ўринга суриб, дунёнинг энг қудратли давлатлари рўйхатида етакчиликни қўлга киритди
Хитой 2026 йил учун дунёнинг энг қудратли давлатлари рейтингида биринчи ўринни эгаллаб, иккинчи поғонадан жой олган АҚШни ортда қолдирди. Етакчи бешликка, шунингдек, Ҳиндистон, Германия ва Япония кирди. Жанубий Корея олтинчи, Франция еттинчи, Буюк Британия эса саккизинчи ўринни банд этди.
Ўзбекистон ушбу рўйхатда 100 та давлат орасида 71-ўринда қайд этилди. Рейтинг World Population Review томонидан U.S. News рейтинги асосида тақдим этилди.
Марказий Осиёда Ўзбекистондан юқорироқ фақат Қозоғистон жой олди ва у 34-ўринни эгаллади. Шу билан бирга, рейтинг мамлакатларнинг нафақат ҳарбий қудрати ёки иқтисодий кўрсаткичларини, балки уларнинг умумий таъсирини баҳолайди.
2024 йил билан солиштирганда Хитой ва АҚШ ўзаро ўрин алмашди: ўшанда биринчи ўринда АҚШ бўлган, Хитой эса иккинчи поғонани эгаллаган эди. Шу билан бирга, 2026 йилда U.S. News рейтинг методологиясини янгилаб, уни кўпроқ ўлчанадиган кўрсаткичларга йўналтирди.
Аввалроқ Ўзбекистон Глобал инновацион индексда 139 та давлат орасида 77-ўринни эгаллаб, бир йил ичида икки поғонага кўтарилган эди. Мамлакат 2030 йилга бориб дунёнинг 60 та етакчи инновацион давлатлари қаторига киришни режалаштирмоқда.