Херсон ва Сумидаги зарбаларда камида тўрт киши ҳалок бўлди
Украина расмийлари маълумотига кўра, 18-сентабр куни Россия қўшинларининг Херсон ва Суми вилоятларига зарбалари оқибатида камида тўрт киши ҳалок бўлди. Одессада эса бир маъмурий бино қисқа вақт оралиғида икки марта зарбага учраган, ўн киши жароҳатланган.
Херсон ва Сумидаги ҳужумларда камида тўрт киши ҳалок бўлди
Херсон вилоятида Россиянинг учувчисиз учиш аппарати зарбаси оқибатида икки киши ҳаётдан кўз юмди. Бу ҳақда вилоят ҳарбий маъмурияти раҳбари Александр Прокудин маълум қилди.
Унинг айтишича, воқеа 18-сентабр куни соат 18:00 лар атрофида Текстилное посёлкасида юз берган. Дрон зарбаси натижасида икки эркак ҳаёт билан мос келмайдиган даражада жароҳат олган.
Шу куни Херсон шаҳридаги шифохоналардан бири ҳам дрон ҳужумига учрагани билдирилди. Учувчисиз аппарат тиббиёт муассасаси ҳудудига портловчи модда ташлаган. Дастлабки маълумотларга кўра, бу ҳужумда жабрланганлар қайд этилмаган.
18-сентабр куни Одесса ҳам бир неча бор ҳужумга учради. Украина Давлат фавқулодда вазиятлар хизмати вилоят бошқармаси маълумотига кўра, зарбалардан бири 11 қаватли маъмурий бинога тегиб, у ерда ёнғин чиқарган.
Фавқулодда хизматлар ҳодиса жойида ишлаётган пайтда шу бино яна бир бор зарбага учради. Натижада ўн киши жароҳат олди, улар орасида икки нафар қутқарувчи ҳам бор.
19-сентабрга ўтар кечаси Одесса яна ҳаво ҳужумига дуч келди. Ҳаво тревогаси эълон қилингач, маҳаллий аҳоли ижтимоий тармоқларда шаҳардаги турар жой биноларидан бирида ёнғин чиққанини акс эттирувчи тасвирларни тарқатди. Ҳодисанинг тўлиқ оқибатлари ҳақида дастлаб батафсил маълумот берилмаган.
Суми шаҳрида эса 18-сентабр кечқурун кўп қаватли турар жой биносига зарба берилди. Украина томони маълумотига кўра, ҳужум бошқарилувчи авиабомба билан амалга оширилган. Портлаш оқибатида бир нечта хонадон шикастланган ва бинонинг бир қисми қулаб тушган.
Маҳаллий ҳокимиятнинг дастлабки маълумотларига кўра, Сумида камида икки киши ҳалок бўлган, яна етти киши яраланган.
Шу куни Киев вилоятида ҳам зарбалар оқибатлари қайд этилди. Вилоят ҳарбий маъмурияти раҳбари Тимур Ткаченконинг айтишича, Буча туманида омбор биноларига берилган зарба натижасида икки эркак жароҳатланган. Бориспил туманида ҳам омбор обьектларига зарар етгани хабар қилинган.