Хегсет АҚШ ҳарбий раҳбариятининг яна бир қатор юқори лавозимли вакилларини ишдан бўшатиши кутилмоқда
Хегсет мудофаа вазирлигини бошқаришга киришганидан бери тахминан 20 нафар адмирал ва генерал ишдан бўшатилди ёки истеъфога чиқди.
Хегсет АҚШ ҳарбий раҳбариятининг яна бир қисмини ишдан бўшатиши кутилмоқда
АҚШ ОАВларига кўра, Мудофаа вазири Пит Хегсет АҚШ Қуролли Кучларидаги адмирал ва генералларнинг 20 фоизини ишдан бўшатишини эълон қилиши кутилмоқда.
Ушбу эълон чоршанба куни Виржиния штатидаги Куантико денгиз пиёдалари базасида, 2025 йилдаги аввалги кадрлар қисқартирилишидан сўнг амалга оширилиши кутилмоқда.
Мудофаа вазирлигининг сўнгги маълумотларига кўра, Қуруқликдаги қўшинлар, Ҳарбий-денгиз кучлари, Денгиз пиёдалари корпуси, Ҳарбий-ҳаво кучлари ва Космик кучларда 800 дан ортиқ фаол хизматдаги генерал ва адмираллар бор.
Хегсет охирги марта 2025 йил сентябрь ойида Куантикода ҳарбий раҳбарларни бирлаштирганида, вазирликни ҳаддан ташқари «либерал» (woke) деб қоралаган ва унинг раҳбарларини жисмоний ҳолати ёмонлиги учун танқид қилиб, «семиз генерал ва адмираллар» «хунук кўриниш» эканини айтган эди.
Хегсетнинг кутилаётган бўшатишлари унинг раҳбарлиги остида АҚШ ҳарбий тизимини кенг кўламли ислоҳ қилишнинг навбатдаги босқичи бўлиб, бу мудофаа вазирлигига у «жангчилик руҳи» деб атайдиган нарсани сингдиришга, жумладан, вазирлик номини Уруш вазирлиги деб ўзгартиришга қаратилган.
Би-би-сининг янгиликлар бўйича ҳамкори CBS News хабарига кўра, Хегсет мудофаа вазири бўлганидан бери камида 20 нафар генерал, адмирал ва фуқаролик ҳарбий раҳбарлари ишдан бўшатилган ёки истеъфога чиққан.
Бунга штаб бошлиқлари бирлашган қўмитаси раиси ҳамда Қуруқликдаги қўшинлар, Ҳарбий-денгиз кучлари ва Ҳарбий-ҳаво кучларининг олий мартабали ҳарбий мулозимларининг ишдан бўшатилиши киради.
Федерал қонун генераллар ва флагман офицерлар сонини чеклайди. Бўш қолган лавозимларни тўлдириш мажбурий эмас.
Ушбу кадрлар алмашинуви фонида Хегсет бир нечта ҳуқуқ ҳимояси ташкилотлари, жумладан, NAACP ва Миллий аёллар ҳуқуқлари маркази томонидан қора танлилар ва аёлларнинг ҳарбий лавозимларда кўтарилишига тўсқинлик қилишда айбланди.
Аризона штатидан демократ сенатор Марк Келли сешанба куни журналистларга Хегсет «ҳарбийларнинг юқори эшелонини энг яхши раҳбарлардан тозалаш жараёнида» эканини айтди.
«Бизга кучли раҳбарлар керак. Бу одамлар ўн йиллик тажрибага эга, улар армиямиз кўрган энг яхши раҳбарлардир. У эса улардан қутулмоқда», деди Келли.
Конгресс тадқиқот хизматининг май ойидаги ҳисоботида айтилишича, раҳбарият тепасида ҳаддан ташқари кўп юқори мартабали мулозимларнинг бўлиши баъзи камчиликларга эга.
Буларга юқори мартабали ҳарбий хизматчиларни боқиш харажатларининг қуйи бўғин офицерларига қараганда кўплиги ва «қарор қабул қилиш жараёнларининг секинлашиши» эҳтимоли киради.
Хегсет томонидан АҚШ ҳарбий раҳбариятининг қисқартирилиши АҚШ-Исроилнинг Эрон билан уруши еттинчи ойига кириб, ўқ-дорилар захираларини тугатаётган бир пайтга тўғри келмоқда.