Хаво шари ИЭС ишини бузди ва Тошкентда ўчишларга олиб келди
Тошкентнинг бир нечта туманида электр энергиясида қисқа муддатли узилиш юз берди. Бунга Қибрай туманидаги Aksa Tashkent ИЭС ҳудудига ҳаво шари тушиши оқибатида трансформаторнинг шикастлангани сабаб бўлди. Видео.
Ҳаво шари ИЭС ишини издан чиқарди ва Тошкентда узилишларга олиб келди
19 октябрь куни кечқурун Тошкент вилоятининг Қибрай туманидаги Aksa Tashkent иссиқлик электр станциясида трансформаторнинг ҳимоя тизими ишга тушди, шундан сўнг станция қуввати 460 дан 185 МВтга тушиб кетди.
Трансформатордаги носозлик Тошкентнинг Юнусобод, Олмазор, Мирзо Улуғбек ва Шайхонтоҳур туманларининг баъзи ҳудудларида электр энергияси етказиб беришда қисқа муддатли узилишларни келтириб чиқарди. Ўзбекистон Энергетика вазирлиги электр таъминоти захира манбалари ҳисобидан тахминан ярим соат ичида тикланганини маълум қилди.
Кейинчалик Энергетика вазирлиги узилиш ИЭСнинг очиқ тақсимлаш қурилмасига учиб келган ҳаво шари тушиши сабабли юз берганига аниқлик киритди.
Эълон қилинган видеоёзувларда кичик бир буюмнинг тушиши ва чақнаш, шунингдек, ерда ётган ёрилган қизил шар кўринади.
Вазирликда электр станциялари, подстанциялар ва бошқа электр қурилмалари яқинида ҳаво шарларини учирмасликка чақиришди.
ИЭС 2022 йил январ ойида Туркиянинг Aksa Enerji компанияси томонидан ишга туширилган эди. Компаниянинг Ўзбекистонда яна учта станцияси бор — Тошкент, Бухоро ва Қашқадарё вилоятларида. Унинг шўъба компанияси Aksa Elektric Самарқанд вилояти электр тармоқларини бошқариш бўйича тендерда ғолиб чиқди ва Тошкент, Сирдарё ҳамда Жиззах вилоятлари электр тармоқларини ҳам бошқарувга олишни режалаштирмоқда.