Харид амалга оширилмаса, жой йўқ: Starbucks China янги қоидаларни жорий этмоқда
Starbucks маҳаллий рақиблари билан рақобатлашаётган бир пайтда, мижозларнинг қаҳвахоналарнинг ўзида хизмат кўрсатиш тажрибасини яхшилаётганини айтмоқда.
Харид қилмасанг, жой йўқ: Starbucks Хитойда янги қоида жорий этди
Бутун Хитой бўйлаб Starbucks филиалларида “Ўтириш учун харид қилинг” мазмунидаги билдиришномалар пайдо бўлмоқда
Пайшанба кунидан бошлаб Starbucks China’нинг янги сиёсати унинг барча 8 000 та дўконида амал қила бошлайди ва унга кўра, мижозлар қаҳвахонада ўтиришни хоҳлашса, нимадир харид қилишлари талаб этилади.
Starbucks China’нинг билдиришича, бу ўзгариш мижозлар учун “дўкон ичидаги таассуротларни” яхшилашга қаратилган. Компания Luckin Coffee каби маҳаллий рақиблар томонидан кучли босимга учрамоқда.
Шу ҳафтада ушбу сиёсат ҳақидаги хабарлар тарқалди, шунингдек, ижтимоий тармоқларда Starbucks дўконлари ичидаги “ўтириш учун харид қилинг” деган ёзувли белгилар акс этган видеолар пайдо бўлди.
Хитой ижтимоий тармоқларидаги кўплаб фойдаланувчилар бу қадамни олқишлашди.
“Ниҳоят, одамлар ҳеч нарса буюртма қилмай, Luckin қаҳвасини ичиб, ўйин ўйнаб ва телефонда бақириб шунчаки ўтирадиган тиғиз вақтлар бўлмайди”, дейилади Weibo’даги энг кўп лайк йиғган шарҳлардан бирида.
Бутун дунё бўйлаб Starbucks филиаллари тўлов қилмай жой эгаллаб олувчилар ва бошқа номақбул мижозлар хулқ-атвори билан курашиб келмоқда.
Ўтган ойда Сычуань провинциясидаги Starbucks дўкони ижтимоий тармоқларда ташқаридаги ўриндиқлари ва столлари занжирлар билан ўраб қўйилгани тасвирланган видеолар тарқалганидан кейин эътиборни тортди. Бу одамларнинг тўлов қилмасдан жойлардан фойдаланишининг олдини олишга қаратилган ҳаракатга ўхшарди.
Жанубий Кореяда Starbucks мижозларга дўконларга “йирик ҳажмли буюмлар” олиб кирмасликни айтди.
Шимолий Америкада Starbucks тўлов қилмасдан ўриндиқлар ва ҳожатхоналардан фойдаланишга йиллар давомида рухсат бериб келган “очиқ эшиклар” сиёсатини якунлаб, тўлов қилувчи мижозларга “устуворлик беришни” хоҳлашини билдирди.
1999 йилда ўзининг биринчи дўконини очганидан бери Хитой Starbucks учун иккинчи энг йирик бозорга айланди. Аммо сўнгги йилларда у арзонроқ маҳсулотларни сотадиган Luckin ва бошқа маҳаллий брендлар томонидан кучли рақобатга дуч келмоқда.
Luckin, шунингдек, иловага асосланган ва маҳсулотни тезгина олиб кетишга урғу берадиган кучли буюртма бериш тизимига эга бўлиб, бу мижозлар ўтириб, егулик ва ичимликлардан баҳраманд бўладиган тўлиқ кафе таассуротини таклиф қилувчи Starbucks моделига чақириқ ташлайди.
2023 йилда Luckin Хитойдаги энг йирик қаҳвахоналар тармоғи сифатида Starbucks’дан ўтиб кетди.
Ўтган йили Starbucks Boyu Capital инвестиция фирмаси билан 4 миллиард долларлик (3,04 миллиард фунт стерлинг) битимнинг бир қисми сифатида Хитойдаги бизнесининг 60 фоиз улушини сотишини маълум қилган эди.
Чоршанба куни эълон қилинган алоҳида баёнотда Starbucks China “мижозлар ҳатто тиғиз соатларда ҳам ўз вақтида ва самимий хизмат олишларини таъминлаш” учун, бошқа инвестициялар қаторида, ўз дўконларига кўпроқ ходимлар жалб қилиш ва рақамли тизимларни янгилашни режалаштираётганини айтди.