Халқаро савдо барқарорлиги бўйича 30 та иқтисодиёт баҳоланди
Буюк Британия 2026-йилги Ҳинрич–ИМД Барқарор савдо индексида биринчи ўринни эгаллади. Халқаро савдони иқтисодий, ижтимоий ва экологик мақсадлар билан уйғунлаштириш қобилияти баҳоланган 30 та иқтисодиёт орасида Сингапур иккинчи, Россия эса 29-ўринда қайд этилди.
Халқаро савдо барқарорлиги бўйича 30 та иқтисодиёт баҳоланди
Индекс Ҳинрич Фоундатион ва ИМД Жаҳон рақобатбардошлиги маркази ҳамкорлигида ишлаб чиқилган. Баҳолаш 72 та кўрсаткични учта асосий йўналиш бўйича қамраб олади.
Умумий рейтингда 100 балл олган Британия 2024-йилга нисбатан бир поғона юқорилаган. Сингапур икки поғона кўтарилиб, иккинчи ўринни эгаллаган. Кейинги ўринларда Янги Зеландия, Ҳонгконг ва Австралия жойлашган.
Баъзи иқтисодиётлар сезиларли ўсишга эришган. Малайзия тўрт поғона кўтарилиб 11-ўринга, Камбоджа ҳам тўрт поғона юқорилаб 15-ўринга чиққан. Шри-Ланка ҳам натижасини тўрт поғона яхшилаб, 22-ўринни эгаллаган.
Япония уч поғона пастлаб саккизинчи, Хитой эса уч поғона тушиб 19-ўринда қайд этилган.
Индекснинг иқтисодий йўналиши мамлакатларнинг халқаро савдо орқали ўсишни таъминлаш имкониятини баҳолайди. Бунда экспорт бозорларининг қанчалик хилма-хиллиги ва давлат қарзининг ялпи ички маҳсулотга нисбати каби омиллар инобатга олинади.
Ушбу йўналишда Сингапур биринчи ўринни олган. АҚШ 2024-йилдаги тўртинчи ўриндан 2026-йилда иккинчи ўринга кўтарилган. Бироқ хабарда АҚШнинг тариф сиёсати ва унинг кенгроқ иқтисодий оқибатлари мамлакат натижасига салбий таъсир қилгани қайд этилган.
Ижтимоий йўналиш инсон капитали ривожини, жумладан, олий таълим билан қамров ва кутилаётган умр давомийлигини ҳисобга олади. Бу борада Австралия Канадани бироз ортда қолдириб, етакчи бўлган.
Экологик йўналишда табиий ресурслардан фойдаланиш самарадорлиги, қайта тикланувчи энергия манбалари ва аҳоли жон бошига карбонат ангидрид чиқиндилари каби кўрсаткичлар баҳоланади. Унда Янги Зеландия биринчи ўринни эгаллаган.
Камбоджа экологик йўналишда 2025-йилдаги 17-ўриндан 2026-йилда учинчи ўринга кўтарилган. Ҳонгконг саккизинчи ўриндан тўртинчига, Ветнам эса 13-ўриндан саккизинчига чиққан.
Индекс барча мамлакатларни қамраб олмайди ва иқтисодиётларнинг умумий қудратини баҳоламайди. У танлаб олинган 30 та иқтисодиётда халқаро савдонинг узоқ муддатли барқарорлигини таққослайди.