Wizz Air самолёти бомба хавфи сабабли Лутонда фавқулодда қўнишни амалга оширди
Мазкур таҳдид ҳаводалигида олингач, Венгрия қирувчи самолёти ҳаво кемасини Будапештгача кузатиб борди.
Лондон Лутон аэропортидан Софияга учаётган Wizz Air самолёти парвоз пайтида бомба борлиги ҳақида таҳдид бўлганидан сўнг, Венгрия қирувчи самолёти томонидан Будапештга кузатиб қўйилди.
Самолёт Будапешт Ференц Лист номидаги халқаро аэропортига фавқулодда қўнишга мажбур бўлди. Wizz Air вакилининг айтишича, маҳаллий ҳукумат органлари «самолёт ва йўловчиларни зарур хавфсизлик текширувидан ўтказган».
Кейинчалик авиакомпания текширув «якунлангани ва ҳеч нарса топилмаганини» маълум қилди ҳамда самолёт тез орада яна йўлга чиқишини қўшимча қилди. Венгрия Мудофаа вазири Ромулус Русзин-Сзендис ўз мамлакати рейсга ҳамроҳлик қилиш учун қирувчи самолёт ажратганини тасдиқлади.
FlightAware парвозларни кузатиш веб-сайтининг хабар беришича, Wizz Air авиокомпаниясининг 4302-рейси Лутонни Гринвич бўйича соат 08:33 да тарк этган ва маҳаллий вақт билан соат 13:25 да (Гринвич бўйича 11:25) Болгария пойтахтига етиб бориши керак эди.
Бироқ, сайт хабарига кўра, самолёт маҳаллий вақт билан соат 12:09 да (Гринвич бўйича 11:09) Будапештга қўнган.
Ижтимоий тармоқдаги постида Русзин-Сзендис бомба ҳақида таҳдид келиб тушганидан сўнг, Wizz Air рейси Будапешт аэропортига қўнишга рухсат сўраганини айтди.
«Бир неча дақиқа ичида Венгрия Мудофаа кучларининг Gripen қирувчи самолёти ҳавога кўтарилди ва йўловчи самолётига ҳамроҳлик қилди», деди у.
Унинг қўшимча қилишича, шундан сўнг қирувчи самолёт базага қайтган ва ҳодисани полиция ўз назоратига олган.
Авиакомпаниянинг билдиришича, фавқулодда қўнишдан сўнг самолёт хавфсизлик текширувлари ўтказилган «ажратилган тўхташ жойига» ҳаракатланган.
Wizz Air, шунингдек, «ҳукумат органлари билан тўлиқ ҳамкорлик қилаётганини» ва йўловчилар ҳамда экипаж хавфсизлиги «энг устувор вазифа бўлиб қолишини» таъкидлади.