Вучич серб бизнесини Ўзбекистон билан фаолроқ ҳамкорлик қилишга чақирди
Вучич серб бизнесини Ўзбекистон билан фаолроқ ҳамкорлик қилишга чақирди
Сербия Президенти Александр Вучич Ўзбекистоннинг технологик соҳада жадал ривожланаётганини таъкидлаб, серб тадбиркорларини ўзбек компаниялари билан ҳамкорликни кенгайтиришга чақирди. У бу ҳақда Сербия-Ўзбекистон бизнес-форумида маълум қилди.
Вучичнинг сўзларига кўра, Ўзбекистоннинг технологик парклар, сунъий интеллект ва биотехнологияларни ривожлантиришдаги ютуқлари айниқса яққол кўзга ташланмоқда. У ушбу йўналишлардаги қўшма лойиҳалар ҳар икки мамлакатнинг кейинги технологик ва саноат ўсишига хизмат қилиши мумкинлигини таъкидлади.
«Мудофаа саноатида ҳам катта имкониятлар мавжуд», — деди Сербия етакчиси ушбу соҳадаги ҳамкорлик истиқболларини кўрсатиб.
Вучич, шунингдек, серб тадбиркорларини ўзбекистонлик ҳамкасблари билан ишлашга чақириб, уларни меҳнатсевар, мақсад сари интилувчан ва ишончли ҳамкорлар деб атади.
Сербия Президенти Шавкат Мирзиёевга қўллаб-қувватлагани ва ҳамкорликка очиқлиги учун алоҳида миннатдорлик билдирди.
«Президент Мирзиёев биз учун барча эшикларни очди», — деди Вучич икки давлат ўртасидаги муносабатларни ривожлантиришга қўшган ҳиссасини алоҳида қайд этиб.
Якунда Сербия етакчиси Сербия Ўзбекистон тажрибасини ўрганиши ва ривожланиш масалаларида ундан ўрнак олишига умид билдирди.
«Сербия ва Ўзбекистон дўстлиги яшасин!» — деди Александр Вучич.
Аввалроқ Мирзиёев ва Вучич стратегик шериклик тўғрисидаги ҳужжатлар пакетини имзолаган эди.