Вучич парламент тарқатилиши ва муддатидан олдин сайлов ўтказилишини маълум қилди

Вучич парламент тарқатилиши ва муддатидан олдин сайлов ўтказилишини маълум қилди

Сербия президенти Александр Вучич Конституция ҳамда Президент тўғрисидаги қонунга таянган ҳолда парламентни тарқатиш ва муддатидан олдин сайлов ўтказиш бўйича қарор қабул қилишини айтди.

Вучичнинг билдиришича, ҳар иккала қарор 9-сентябр куни маҳаллий вақт билан соат 12:00 да расман эълон қилинади. Сербияда парламент сайловлари 25-октябр куни бўлиб ўтади, сайловолди кампанияси эса 46 кун давом этади.

Президент сайлов натижаларини “қандай бўлишидан қатъий назар” қабул қилишини айтди. У рақиблари ғалаба қозонса, уларни табриклашини ҳам маълум қилди. Қонунга кўра, парламент сайловларини мамлакат президенти тайинлайди ва сайлов тайинланган кундан овоз бериш кунигача камида 45, кўпи билан 60 кун ўтиши керак.

Бундан олдин ҳукмрон Сербия прогрессив партияси (СПП) бош кенгаши бўлажак парламент сайловларида “Ягона Сербия” рўйхатига амалдаги президент Александр Вучич бощилик қилишини билдирган эди. Ғалаба қозонилган тақдирда Вучич бош вазирликка номзод бўлади.

Сербияда деярли икки йилдан бери Вучичнинг истеъфоси талаб қилинмоқда. Бу талаб 2024-йил 1-ноябрда Нови-Сад шаҳридаги темирйўл вокзали биносининг томи қулаши оқибатида 16 киши ҳалок бўлганидан кейин бошланган. Воқеадан сўнг мамлакатда оммавий норозилик намойишлари кучайган. Намойищилар масъулларни жазолашни ва мамлакат раҳбариятининг истеъфосини талаб қилган.

2026-йил апрелида Вучич парламентга муддатидан олдин сайлов ўтказишга тайёрлигини айтганди. Июн ойида эса бир неча ҳафтадан сўнг истеъфога чиқишини маълум қилган. Унинг президентлик ваколати 2027-йилда тугайди, парламентнинг навбатдаги сайловлари эса 2027-йил декабрида ўтказилиши керак эди.