Сербия октябрда янги парламентни сайлайди
Сербияда навбатдан ташқари парламент сайловлари 2026-йил октябр ойида бўлиб ўтади. Президент Александр Вучичнинг маълум қилишича, овоз бериш 18 ёки 25 октябрга белгиланади ва аниқ сана яқин кунларда эълон қилинади. Сайловлар аввал режалаштирилган муддатдан бир йилдан кўпроқ эрта ўтказилмоқда.
Сербия президенти Александр Вучичнинг маълум қилишича, мамлакатда навбатдан ташқари парламент сайловлари жорий йилнинг октябр ойида бўлиб ўтади. У бу ҳақда 20-август куни РЦ телеканали орқали хабар берди.
Вучичнинг сўзларига кўра, овоз бериш 18 ёки 25 октябр кунларидан бирида ўтказилади. Сайловларнинг аниқ санаси яқин кунларда эълон қилиниши кутилмоқда. Шу тариқа, парламент сайловлари дастлаб белгиланган муддатдан бир йилдан кўпроқ вақт олдин ўтказилади.
Июн ойи охирида Вучич яқин келажакда президентлик лавозимини муддатидан олдин тарк этиш нияти борлигини ҳам айтган эди. У Сербияда 12 йилдан бери ҳокимият тепасида бўлиб, президентлик ваколатининг иккинчи муддати 2027-йил ўрталаридагина якунланади. Сербия Конституциясига кўра, бир шахс мамлакат президенти лавозимини икки муддатдан ортиқ эгаллаши мумкин эмас.
Сербияда бир ярим йилдан ортиқ вақтдан бери ҳукумат ва коррупсияга қарши оммавий намойишлар давом этмоқда. Норозилик аксияларига Нови-Сад шаҳридаги темирйўл вокзали айвонининг қулаб тушиши сабаб бўлган, бу фожиа оқибатида 16 киши ҳалок бўлган.
Реутерс маълумотларига кўра, талабалар бощилигидаги намойишларга мунтазам равишда ўн минглаб, айрим ҳолларда эса юз минглаб одамлар чиқмоқда. Намойищилар Вучич ва унинг атрофидагиларни кенг тарқалган коррупсия, уюшган жиноятчилик билан алоқалар, сиёсий рақибларга нисбатан зўравонлик ишлатиш ҳамда сўз эркинлигини чеклашда айбламоқда. Сербия ҳукумати ва Вучич эса бундай айбловларни рад этиб келади.
Намойищиларнинг асосий талабларидан бири айнан муддатидан олдин парламент сайловларини ўтказиш эди. Жамоатчилик фикри сўровларида келтирилган маълумотларга кўра, Сербия аҳолисининг қарийб 80 фоизи талабаларнинг коррупсияга қарши талабларини қўллаб-қувватлайди. Сўралганларнинг тахминан 64 фоизи эса намойишларнинг ўзини қўллаб-қувватлашини билдирган.