UZMAMF eSports GT3 Championship иккинчи босқичи шоҳсупасини Ўзбекистон пойгачилари эгаллашди

UZMAMF eSports GT3 Championship иккинчи босқичи шоҳсупасини Ўзбекистон пойгачилари эгаллашди

2026 йил 4 октябрь куни Ўзбекистон Миллий автомобиль ва мотоцикл федерацияси (UZMAMF) томонидан SimAcademy билан ҳамкорликда ҳамда Ўзбекистон Республикаси Спорт вазирлиги кўмагида ташкил этилган UZMAMF eSports GT3 Championship иккинчи босқичи бўлиб ўтди.

Мусобақалар майдонча ва Simagic ускуналарига эга пойга симуляторларини тақдим этган SimAcademy базасида бўлиб ўтди. Босқичда саралаб олинган 18 нафар иштирокчи қатнашди. Пойгалар Сильверстоун виртуал трассасида BMW M4 GT3 автомобилларида ўтказилди.

Босқич дастуридан ҳар бири 20 дақиқа давом этган иккита ярим финал (предфинал), иккита 15 дақиқалик спринт пойгаси ва икки баравар очко бериладиган 30 дақиқалик асосий пойга ўрин олди.

1-сонли Ярим финалда Николай Гирда ғалаба қозонди. Иккинчи ўринни Тошкенбой Абдуллаев, учинчи ўринни эса Санжар Ўлмасбоев эгаллади. 2-сонли Ярим финал ғолиби Рустам Хабиров бўлди. Николай Гирда ва Рустам Хабиров, шунингдек, квалификацияда энг яхши натижаларни кўрсатишди ва ўз ярим финалларида энг тезкор айланишни амалга оширишди.

Босқичнинг спринт қисмида Николай Гирда ҳар икки квалификацияда энг яхши натижаларни кўрсатиб ва ҳар бир пойгада энг тезкор айланишларни қайд этиб, иккала пойгада ҳам ғолиб чиқди. Биринчи спринтда Рустам Хабиров иккинчи, Абдуборий Султонов эса учинчи бўлиб маррага етиб келди. Иккинчи спринтда иккинчи ўринни Тошкенбой Абдуллаев эгаллади, совриндорлар учлигини эса Рустам Хабиров якунлаб берди.

Асосий пойга 50 очко жамғарган Тошкенбой Абдуллаевнинг ғалабаси билан якунланди. Николай Гирда иккинчи бўлиб маррага келди ва 40 очкога эга бўлди, Рустам Хабиров учинчи ўринни эгаллаб, ўз ҳисобига 30 очко қўшиб қўйди. Асосий пойганинг квалификациясидаги энг яхши натижа ва энг тезкор айланиш Николай Гирдага насиб этди.

UZMAMF eSports GT3 Championship иккинчи босқичининг барча пойгалари якунларига кўра, ўринлар қуйидагича тақсимланди: биринчи ўринни Николай Гирда эгаллади. Иккинчи ўринни Тошкенбой Абдуллаев банд этди, Рустам Хабиров эса учинчи бўлди.

Иккинчи босқичдан сўнг UZMAMF eSports GT3 Championship умумий ҳисобида 202 oчко жамғарган Николай Гирда пешқадамлик қилмоқда. Иккинчи ўринни 145 очко билан Тошкенбой Абдуллаев, учинчи ўринни эса 111 очко билан Рустам Хабиров эгаллаб турибди.

UZMAMF мусобақани ўтказишда кўрсатган кўмаги учун Ўзбекистон Республикаси Спорт вазирлигига ҳамда майдонча ва техник ускуналар тақдим этгани учун SimAcademy компаниясига миннатдорчилик билдиради.