Уйида яшаб ўқийдиган университет талабаси уйдан кетишга «тайёр эмас эди»
Ўқишни бошлаётган талабаларнинг учдан бир қисми уйда яшамоқда, дейди Глостершир университети.
Уйида яшаб ўқийдиган талаба уйдан кетишга «тайёр эмасди»
Офелия Байнснинг айтишича, унинг кўплаб дўстлари ҳам уйида яшамоқда
Университетнинг маълум қилишича, бу йил ўқишни бошлаётган талабаларнинг учдан бир қисми «молиявий жиҳатдан яхшироқ аҳволда» бўлиш учун уйида яшамоқда ёки маърузаларга қатнаб ўқимоқда.
Глостершир университети (The University of Gloucestershire) талабалар учун мослашувчан турар жойлар, чегирмали транспорт чипталари ва айнан қатнаб ўқийдиганлар учун қурилган янги қулайликларни таклиф қилиш орқали уларни қўллаб-қувватлашни кучайтирганини билдирди.
Глостерда улғайган коммуникация ва медиа йўналиши талабаси Офелия Байнс бир кун келиб шаҳардан кетишга умид қилса-да, ҳозирча бунга «тайёр эмаслигини» айтди.
«Ётоқхонада яшайдиган кўплаб одамларга қараганда молиявий жиҳатдан яхшироқ аҳволда эканимни биламан», деди у ва «жуда кўп одамлар» худди шундай йўл тутаётганини қўшимча қилди.
«Мен билан бирга мактабда ўқиганларнинг аксарияти шу ҳудудда қолиб, университетга кирди.
Мен учун жуда яқин жойда яшаб туриб, турар жой учун пул тўлашнинг ҳеч қандай мантиғи йўқ эди, устига-устак, дўстларим билан кўришиб турибман ва университет ҳаётини ҳам ҳис қиляпман — бу ҳар томонлама қулай», дея қўшимча қилди у.
«Шунингдек, кучугимни ҳам ташлаб кетолмасдим, оиламга яқин бўлиш эса мен учун жуда муҳим».
Суд психологияси йўналишида иккинчи курсда ўқишни бошлаган Тейлор Баркер университетнинг Глостердаги Сити кампусидаги маърузаларга бориш учун 40 дақиқалик йўл босиб ўтади.
Унинг айтишича, уйдан туриб ўқиш «қўшимча қулайлик» бўлиб, молиявий жиҳатдан «қатнаб ўқиш фойдалироқ».
«Оилам мен учун жуда муҳим, уйдан кўчиб кетиб, бу алоқани йўқотишни хоҳламайман», деди у.
«Кўчиб кетиш ҳақидаги фикрнинг ўзи анча қўрқинчли эди».
Унинг айтишича, у «бироз узоқроқда жойлашган бир нечта университетларни бориб кўрган, лекин улар унга ёқмаган».
«Бу менинг мустақил бўлишимга халақит бермади. Маърузаларда одамлар билан танишасиз, кўпинча ўзингизга ўхшаган, худди шундай масофадан қатнайдиган ёки аслида сизга жуда яқин яшайдиган одамларни топасиз.
Бу шунчаки одамлар билан танишишнинг бошқача усули».
Университетнинг талабалар билан ишлаш бўйича директори Стюарт Дав одамларнинг яшаш харажатлари сабабли шундай танлов қилишга мажбур бўлаётгани «ачинарли» эканини, бироқ қатнаб ўқиш «университет харажатларини тежашга» ёрдам бериши ва талабаларга «ярим ставкали ишда ишлашни давом эттириш ёки оиласи ва дўстларига яқин бўлиш» имконини беришини айтди.
У қўшимча қилди: «Питтвилл [кампуси]даги мослашувчан турар жойларимиз талабаларнинг ҳар куни уйдан кўчиб кетиш ёки қатнаш ўртасида танлов қилишлари шарт эмаслигини англатади, улар уйда яшаб, ҳафтасига уч кечагача кампус яқинида қолиш имкониятига эга.
Ушбу имкониятлар қатнаб ўқийдиган талабаларга университет таклиф қиладиган барча нарсалардан осонликча фойдаланишда ёрдам беради деб умид қиламиз».