Уйдан чиқариб юборилган испаниялик пенсионер ўз уйига қайтиши мумкин, дейди адвокат
87 ёшли Марикармен Абаскалнинг уйидан кўчириб юборилиши бутун Испания бўйлаб кенг кўламли норозилик намойишларига сабаб бўлди.
Уйидан чиқариб юборилган испаниялик пенсионер аёл ўз уйига қайтиши мумкин, дейди адвокат
Марикармен Абаскалнинг уйидан чиқариб юборилиши бутун Испания бўйлаб йирик норозилик намойишларига сабаб бўлди.
Испаниядаги уй-жой инқирози рамзига айланган кекса ёшли ногирон аёлга Мадриддаги уйига қайтишга рухсат берилади, деди унинг адвокати.
87 ёшли Марикармен Абаскал 23 сентябрь куни 70 йилдан ортиқ яшаган хонадонидан замбилда мажбурий олиб чиқиб кетилган эди. У уйидан чиқариб юборилганидан кейин шифохонага ётқизилган.
Бу ҳолат бутун мамлакат бўйлаб ғазабга сабаб бўлди ва Бош вазир Педро Санчес сешанба куни Вазирлар Маҳкамаси йиғилишида уй-жой билан таъминлаш бўйича ёрдам чораларини кўришга ваъда берди.
Абаскалнинг адвокати Беатрис Дуро матбуот анжуманида «ҳар икки томондан ҳам хайрихоҳлик» бўлганини ва Абаскал янги шартнома бўйича кескин оширишларсиз, аввалгига ўхшаш ижара ҳақини тўлашини айтди.
Абаскалнинг отаси ушбу мулкни илк бор 1956 йилда ижарага олган ва ота-онаси вафот этганидан кейин у ижарачи бўлиб қолган, бу даврда ижара ҳақи чекланган эди.
Мулкни 2018 йилда сотиб олган «Urbagestión» инвестиция фирмаси ижара ҳақини ойига 500 евродан (428 фунт стерлинг; 572 доллар) 2650 еврога (2280 фунт стерлинг; 3020 доллар) оширган.
Кейинчалик компания уни 1650 еврогача туширишни таклиф қилган, бироқ у 1350 евролик ойлик пенсияси билан буни барибир тўлай олмас эди.
Уни уйдан чиқариб юбориш бўйича аввалги учта уриниш судлар томонидан тўхтатиб қолинган.
Унинг иши бутун мамлакат бўйлаб норозилик намойишларини келтириб чиқарди ва шанба куни ўн минглаб одамлар уй-жой тақчиллиги ва ижара ҳақининг ошиши фонида уйдан чиқариб юборишга қарши чиқиш ҳамда ижарачилар ҳуқуқларини кучлироқ ҳимоя қилишни талаб қилиб, Испания пойтахти кўчалари бўйлаб юриш қилишди.
Дуронинг айтишича, ҳали имзоланмаган ушбу келишув «ижтимоий сафарбарлик натижаси»дир.
Унинг қўшимча қилишича, ҳозирда чарчоқ туфайли даволанаётган Абаскал ўзини яхши ҳис қилганидан кейин шартномани имзолайди.
Унинг тарафдорлари буни ғалаба деб аташди, бироқ бу каби уйдан чиқариб юборишларни тўхтатиш ва арзонроқ уй-жойлар учун курашни давом эттиришларини билдиришди.
Испания Банки ҳисоб-китобларига кўра, талаб ва янги қурилишлар ўртасидаги фарқдан келиб чиқиб, мамлакатда 700 000 та уй-жой етишмаяпти.
Парламентда кўпчилик ўринга эга бўлмаган Педро Санчеснинг Социалистик партияси жамоатчилик ғазабини босиш учун қонун қабул қилишга умид қилмоқда.