Уй-жойига Россия зарбаси теккан украиналик теннисчи аёл фақат Ролан Гаррос сочиғи қолганини айтди
Даяна Ястремська Одесадаги квартирасига Россия ракетаси «тўғридан-тўғри келиб урилганини» ва ундан фақат Ролан Гаррос сочиғи қолганини айтди.
Россия зарбасидан кейин хонадонидан фақат Ролан Гаррос сочиғи қолди, дейди украиналик теннисчи
Даяна Ястремская оиласининг хонадони Россия томонидан отилган «Калибр» қанотли ракетасининг «тўғридан-тўғри тегиши» оқибатида вайрон бўлганини айтди
Украиналик теннисчи Даяна Ястремская Қора денгиз бўйидаги Одесса портига Россия ҳаво ҳужуми оқибатида оиласининг хонадони вайрон бўлганини маълум қилди.
«"Рус дунёси" мана шундай кўринишга эга. "Калибр" қанотли ракетасининг тўғридан-тўғри тегиши», деб ёзди у ижтимоий тармоқда ёнаётган кўп қаватли турар жой биноси сурати билан бирга.
«Омон қолган ягона нарса Ролан Гаррос... сочиғи бўлди», дея қўшимча қилди 26 ёшли спортчи ва вайроналар орасида осилиб турган Париж Катта дубулға турнирининг машҳур лой-оловранг сочиғи суратини жойлаштирди.
Одесса вилояти раҳбари Олег Кипер жума куни оқшомда Одесса ва яқин атрофдаги Черноморскка уюштирилган ракета ва дрон ҳужуми оқибатида 37 киши, жумладан, бир чақалоқ жароҳатлангани, икки киши эса бедарак йўқолганини маълум қилди.
«Россия ракетаси Одессадаги хонадонимизни вайрон қилди... РАМЗИЙ. Жаҳон теннисининг бир бўлаги Россия ракетасидан омон қолди. Уйимиз эса йўқ», деб ёзди Ястремская шанба куни Instagram'да.
«@wta @itf_reviews Бу суратларга бизнинг кўзимиз билан боқинг», деди у жаҳон теннисининг бошқарув органлари — Хотин-қизлар теннис ассоциацияси (WTA) ва Халқаро теннис федерациясига (ITF) мурожаат қилиб.
2024 йилда Australian Open турнирининг ярим финалигача етиб борган Ястремская айни пайтда аёллар ўртасидаги яккалик баҳслари жаҳон рейтингида 113-ўринни эгаллаб турибди.
2022 йилда Украинага кенг кўламли босқин бошланганидан бери украиналик спортчиларнинг уйлари Россия томонидан нишонга олиниши биринчи марта содир бўлаётгани йўқ.
Ўтган йили Украина миллий футбол терма жамоаси ярим ҳимоячиси Георгий Судаков пойтахт Киевдаги хонадонига рафиқаси ва фарзанди уйда бўлган вақтда Россия дрони келиб урилиши оқибатида жиддий шикаст етганини айтган эди.
Даяна Ястремская жорий йилда Нью-Йоркда бўлиб ўтган US Open турнирида иштирок этиб, биринчи даврада мағлубиятга учраган эди.