Университетлар супер-контракт миқдорларини эълон қилмоқда
Ўзбекистондаги давлат олий таълим муассасалари қабул чегарасидан 4,05 баллдан ортиқ балл етмаган абитуриентлар учун супер-контракт миқдорларини эълон қилмоқда.
Университетлар супер-контракт миқдорларини маълум қилмоқда. Хусусан, Тошкент давлат юридик университетида бакалавриатнинг юриспруденсия ва яна учта йўналишида кундузги таълим шакли учун супер-контракт 269 960 400 сўм этиб белгиланди.
Термиз давлат университетида супер-контракт миқдорлари йўналишга қараб 29,6 млн сўмдан бошланади. Юриспруденсия, халқаро муносабатлар ҳамда давлат ва жамият бошқаруви йўналишлари учун энг юқори миқдор 90 млн сўм қилиб белгиланган.
Наманган давлат университети йўналишга қараб 22,9 млн сўмдан 31,9 млн сўмгача бўлган нархларни белгилади.
Тошкент кимё-технология институти Янгиер филиалида супер-контракт 22,2 млн сўмдан бошланиб, 48,1 млн сўмгача боради.
Талабгорлар олийгоҳларнинг расмий сайти, ижтимоий тармоқлардаги расмий саҳифалари ёки телефон рақами орқали аниқлик киритиши мумкин.
Супер-контракт асосида ўқиш учун аризалар қабул ҳали бошланмади. Жараён бошлангач, ариза онлайн тарзда қабул қилинади.
Давлат олийгоҳларига ўқишга кирганлар (шу жумладан, кейинроқ очилган 6-йўналишга ҳам) базавий тўлов-контракт асосида таҳсил олади. Базавий контракт миқдорлари охирги марта 2025-йил сентабрда эълон қилинган.
Жорий ўқув йилида бу нархлар ўзгариши ёки ўзгаришсиз қолиши маълум эмас.