Университетлар 30 000 фунт стерлинг эвазига контент яратиш бўйича илмий даражаларни таклиф қилмоқда. Аммо улар бунга арзийдими?
Контент яратиш бўйича илмий даражалар одамларга ижтимоий тармоқлардаги постлари орқали пул ишлашга ёрдам беришни мақсад қилган.
Университетлар контент яратиш бўйича 30 000 фунт стерлинг эвазига илмий даражалар таклиф қилмоқда. Аммо улар бунга арзийдими?
Дестини Макгоуэн ҳозирда контент яратувчиси сифатида пул ишламоқда
Университет курслари ҳақида гап кетганда, бу баъзиларда ҳайрат уйғотиши мумкин, аммо Дестини Макгоуэн ўзи ўқиган курс фойдали бўлганига шубҳа қилмайди.
Июль ойида 21 ёшли қиз Ноттингем Трент университетини контент яратиш йўналиши бўйича тамомлади.
Талабаларга Instagram, TikTok ва YouTube учун видео ва постлар яратишни ўргатиш билан бир қаторда, курс аудиторияни кенгайтириш, брендлар билан ишлаш ва контентни монетизация қилиш йўлларини ҳам қамраб олган.
«Мен доим тадбиркор бўлишни хоҳлардим, шунинг учун мен учун бу курс ўзим эга бўламан деб ишонган универсал кўникмалар билан боғлиқ эди», дейди Дестини ўзи ўрганган ижтимоий тармоқлар ва бизнес элементларига ишора қилиб.
У ҳали фаолиятининг бошида ва айнан қанча даромад топишини айтишни истамайди, лекин аллақачон пул ишлаётганини айтади.
Ўзининг шахсий саҳифаларида модага оид контент жойлаштириш билан бир қаторда, у бошқа одамлар учун видеолар яратади ва камера қаршисида сотиладиган маҳсулотларни тақдим этувчи TikTok жонли эфир сотувчиси сифатида ҳам ишга ёлланган.
Унинг айтишича, курс унга ускуналар, технологиялар ва соҳадаги алоқалардан фойдаланиш имкониятини берган.
«Университет ташкил этган панел муҳокамалари орқали учратган ажойиб инсонлар даражасига чиқиш учун оддий одамга беш йилдан 10 йилгача вақт керак бўларди», деб тушунтиради у.
Ноттингем Трент университетининг маълум қилишича, 2022 йилда йўлга қўйилган контент яратиш бўйича бакалавриат йўналиши «амалий тажриба» таклиф этади.
Буюк Британиядаги бир қатор университетлар ҳозирда шунга ўхшаш курсларни олиб бормоқда. Брайтон университети талабаларга «шовқин-сурон орасидан ёриб ўтадиган контент» яратишни ўргатишини айтади.
АҚШда Аризона давлат университети ўзининг шунга ўхшаш малака даражаси талабаларга «ижодкорликни аудитория билан боғланадиган контентга айлантиришга» ёрдам беришини таъкидлайди.
Аммо нарх анча юқори. Ноттингем Трент ва Брайтондаги уч йиллик ўқиш ҳозирда Буюк Британия талабалари учун йилига 9 790 фунт стерлингни ташкил этади, Аризона давлат университетининг стандарт йиллик тўлови эса ушбу штат резиденти учун 14 724 долларни (11 000 фунт стерлинг) ташкил қилади.
Хўш, бу илмий даражалар бунга арзийдими?
Буюк Британияда яшовчи, тўлиқ вақтли контент яратувчиси Knightenator бунга шубҳа билан қарайди. «Мен бу курсда ўқимаган бўлардим», дейди у.
Ўз ҳақиқий исмини ошкор қилмайдиган 31 ёшли аёл 2015 йилдан бери ижтимоий тармоқларда гейминг ва саёҳат видеоларини жойлаштириб келади. Ҳозирда унинг Twitch'да 65 000 ва ТикТок'да 100 000 дан ортиқ кузатувчиси бор.
Контент яратиш унинг асосий иши бўлиб, у қанча пул топишини айтмаса-да, даромадининг катта қисми ўзи тарғиб қиладиган бренд шартномаларидан келишини айтади.
«Тўғрисини айтсам, ўз тажрибамдан келиб чиқиб айтаманки, компаниялар сизда контент яратувчиси дипломи бор-йўқлигига унчалик аҳамият бермайди», дейди у.
Унинг қўшимча қилишича, интернет қандай бошлаш кераклиги ҳақидаги бепул қўлланмаларга тўла. «Агар сизда контент яратувчиси бўлиш иштиёқи бўлса, маслаҳатлар аллақачон мавжуд ва уч йиллик ўқишга мажбурият олиш шарт эмас».
Унинг маслаҳати — бошқа одамларнинг контентини ўрганиш ва ўз йўналишингизни (ниша) топишдир. «Тўғрисини айтсам, ҳозирги замонда бу ишни қила олиш учун кўп нарса керак эмас деб ўйлайман».
Аммо Аризона штатининг Финикс шаҳридан бўлган контент яратувчиси Айеша Бизли бу фикрга қўшилмайди.
Таомлар, мода ва турмуш тарзи ҳақида постлар ёзувчи 36 ёшли аёл, агар 2010-йилларнинг бошида Tumblr'да блог юритишни бошлаган пайтида шундай курслар бўлганида, улардан бирига албатта ёзилган бўлишини айтади.
Унинг фикрича, олий маълумот, айниқса кун кечириш учун пул ишлаш масаласида «аниқроқ йўл» кўрсатган бўларди.
«Буни шунчаки севимли машғулотдан менга пул келтирадиган нарсага қандай айлантиришим мумкин, деган бизнес фикрлаш тарзига эга бўлишингиз керак», дейди Айеша.
Унинг қўшимча қилишича, бундай курслар контент яратиш маркетингнинг тобора муҳим қисмига айланиб бораётганини тан олишда «замондан олдинда» бормоқда.
«Ҳозир сиз бизнес эгаси, тадбиркор бўласизми ёки шахсий бренд яратасизми, рақамли маконда мавжуд бўлишингиз шарт», деб тушунтиради у.
Ноттингем Трент ва Аризона давлат университетларининг илмий даражалари Атлантика океанининг иккала томонида ҳам контент яратувчилар иқтисодиёти жадал ривожланаётган бир пайтда пайдо бўлмоқда. Ўтган йилги ҳисоботлардан бирига кўра, биргина YouTube контент яратувчилари Буюк Британия иқтисодиётига 2,2 миллиард фунт стерлинг ҳисса қўшмоқда.
Шу билан бирга, 2024 йилги сўровнома АҚШдаги 18 дан 30 ёшгача бўлган ҳар уч кишидан бири блогер (инфлюэнсер) бўлишни хоҳлашини кўрсатмоқда.
Бироқ, Ноттингем Трент университетининг контент яратиш бўйича курс раҳбари ва катта ўқитувчиси Жеки Гуррнинг айтишича, курсдаги аксарият одамлар аслида блогер бўлишни мақсад қилмаган.
Гурр учун контент яратиш — бу ташкилотларга тобора кўпроқ керак бўлаётган профессионал кўникмадир, хоҳ у киши ўз бизнесини юритсин, компания ичида ишласин, агентликка қўшилсин ёки бир нечта мижозлар билан фрилансер сифатида ишласин.
«Бу кўникмаларни мутлақо ўргатиш мумкин. Талабалар видеоконтентни режалаштириш ва ишлаб чиқишни, кампанияларни ривожлантиришни, аудиторияни тушунишни, самарадорлик маълумотларини таҳлил қилишни ва ушбу маълумотлар асосида стратегияларни мослаштиришни ўрганадилар».
Унинг қўшимча қилишича, контент яратишнинг бизнес томони «ўқишнинг муҳим қисмидир», унда талабалар монетизация ва соҳанинг тижорат томонини муҳокама қиладилар.
Аммо университет дипломи блогер сифатида тезда муваффақият келтиради деб ўйлайдиган ҳар бир кишини Жеки Гурр огоҳлантиради: «Муваффақиятли блогер бўлиш кўп жиҳатдан омадга боғлиқ, биз эса омад ёки шахсиятни ўргата олмаймиз».