Украина Старлинк ёрдамида Россияга зарба бериши мумкин — ФТ
Украина Старлинк ёрдамида Россияга зарба бериши мумкин — ФТ
Илон Маск Украинага Старлинк билан жиҳозланган дронлардан Россия ҳудудидаги ҳарбий нишонларга зарба бериш учун фойдаланишга рухсат беришга тайёрлигини билдирган, аммо якуний қарорни АҚШ Оқ уйи қабул қилиши керак. Бу ҳақда Финансиал Тимес хабар берди.
Нашр маълумотларига кўра, Украина президенти Владимир Зеленский Илон Маскдан Старлинк билан жиҳозланган дронларни Украина чегарасидан 200 километргача узоқликдаги Россиянинг баллистик ракета учириш қурилмаларига қарши қўллашга рухсат беришни сўраган.
Масаладан хабардор манбаларнинг айтишича, Маск аввалроқ Украинанинг собиқ мудофаа вазири Михаил Федоровга Старлинк ўрнатилган дронлардан Украина ҳудудидан ташқарида Россия нишонларини йўқ қилиш учун фойдаланишга рухсат беришга тайёрлигини билдирган. Бироқ Маск бу қарор сиёсий хусусиятга эга эканини ва уни Оқ уй қабул қилиши кераклигини айтган.
Украина учун бундай имконият баллистик ракеталарга қарши курашда янги воситага айланиши мумкин. Бундай ҳолатда Украина Россия ракетаси учирилишини кутиб, уни ҳавода уриб тушириш ўрнига, Россия ҳудудидаги ракета учириш қурилмаларини аниқлаб, олдиндан йўқ қилиш имконига эга бўлади.
Украинанинг Фире Поинт мудофаа компанияси ҳаммуассиси ва бош конструктори Денис Штилерман аввалроқ Старлинк тизимини узоқ масофали зарбдор қуролларга интеграция қилиш Россия ҳудудининг ичкарисидаги ҳаракатланувчи нишонларга қарши самаралироқ курашиш имконини беришини айтган. “Биз ўқларни уриб тушириш ўрнига, камончиларни нишонга оламиз”, дея тушунтирган Штилерман бундай ёндашув моҳиятини.
Украина ҳозирда Россиянинг ракета учириш қурилмаларига зарба бериш учун Маскнинг Старлинк тизимидан фойдаланишга рухсат олишга уринмоқда. ФТ маълумотларига кўра, АҚШ президенти Доналд Трамп эса бу режани қўллаб-қувватлашга мойил эканини намойиш этмаган.
Аввалроқ, Украинага қурол-яроғ етказиб берувчи Британия мудофаа компания раҳбарлари Россия жосуслари нишонига айланиши мумкинлиги ҳақида огоҳлантирилган эди. Британия ҳукуматининг юқори мартабали амалдорлари ёз бошида мудофаа компания раҳбарлари билан ўтказган давра суҳбатида уларга ва ходимларига нисбатан Кремл томонидан юзага келаётган таҳдид кучайгани ҳақида маълумот берган.