Украина АҚШ музокарачиларига урушни тугатиш бўйича таклифлар тақдим этди – Зеленский
Украина раҳбари сўзларига кўра, россияликлар кузда, парламент сайловидан кейин сафарбарлик эълон қилишга тайёргарлик кўрмоқда.
Украина Президенти Володимир Зеленскийнинг сўзларига кўра, Украина АҚШ музокарачиларига Россия билан урушни якунлаш бўйича ўз таклифларини тақдим этган. Шунингдек, у Россия келгуси ойда бўлиб ўтадиган парламент сайловларини янги сафарбарлик эълон қилиш учун баҳона сифатида ишлатишини тахмин қилди. Бу ҳақда у кечки видеомурожаатида маълум қилди.
Давлат раҳбари шундай деди: "Биз ўз таклифларимизни Америка томонига топширдик. Қўшма Штатлар мудофаамизни, айниқса ҳаво ҳужумидан мудофаа соҳасида мустаҳкамлашга ёрдам бериши ҳамда Россияга урушни давом эттиришга эмас, балки уни тугатишга тайёргарлик кўриш учун ўз режаларини ўзгартиришга мажбурлаш мақсадида босим ўтказиши мумкин."
Зеленскийнинг таъкидлашича, Украина разведкасида Россия жанговар таркибни тўлдириш мақсадида сентябр ойидаги сайловдан янги сафарбарлик эълон қилиш учун фойдаланишига оид далиллар мавжуд.
"Улар кузда, парламент сайлови саҳналаштирилиши биланоқ, сафарбарликка тайёргарлик кўрмоқда. Сўнгра, "сайлов" деб аталувчи тадбирдан кейин у (Путин) йил охиригача қўшимча бир неча юз минг россияликни, келаси йили эса яна шунчасини тезкор сафарбар қилишни режалаштирмоқда," деди Зеленский. У бу "гўёки россияликлар урушни қўллаб-қувватлаётгандек тасаввур уйғотиш" режасининг бир қисми эканини қайд этди.