Украина Россиянинг муҳим инфратузилмасига зарбани тўхтатишга тайёр - Зеленский шартни айтди
Аммо Украина Россиянинг бирор-бир келишувга амал қилиш ниятида эканига ишончи комил эмас, – деди президент.
Украина Россиянинг муҳим инфратузилмасига зарба беришни тўхтатишга тайёр — Зеленский шартни айтди
Украина ҳамкорларига Россия билан ўта муҳим инфратузилмани вайрон қилишни тўхтатадиган келишувни таъминлашни таклиф қилди. Бу ҳақда Украина президенти Володимир Зеленский маълум қилди.
Давлат раҳбарининг фикрича, озиқ-овқат, энергетика ва ҳаётни таъминловчи бошқа асосий унсурлар ҳимоя остида бўлиши керак, чунки «Россия зарбалари аввало айнан шуларга қарши қаратилган». У ҳар куни Украина энергия обьектлари, порт инфратузилмаси, логистика, озиқ-овқат ва фармацевтика омборлари нишонга олинаётганини эслатиб ўтди.
«Украина Россиянинг қандайдир келишувга риоя қилиш истаги борлигига ишончи комил эмас», – деди Зеленский ва бу борада Украинанинг позициясини эълон қилди.
Унинг сўзларига кўра, «агар ҳамкорлар Россиянинг электр энергиямиз, бошқа энергетика обьектларимиз, муҳим инфратузилмамиз, озиқ-овқат таъминотига зарба бермасликка тайёр бўлса, биз ҳам, албатта, ўз зарбаларимизни тўхтатишга тайёрмиз».
Зеленский бу ишончли, узоқ муддатли бўлиши ва одамлар ҳаётига сезиларли таъсир кўрсатиши кераклигини таъкидлади.
«Бу россияликлар ўз сайловини ўтказиб, айни шу вақтда бензин ва дизел бўйича кескинликнинг юмшашига эришганидан сўнг барбод бўлмаслиги керак», – деб таъкидлади президент.
У урушни тугатиш кераклигини қайд этди: «Муҳим инфратузилма бўйича деескалация тинчлик сари биринчи қадам бўлиши мумкин».
Президент Украинада ҳамкорлардан аниқ таклифлар кутилаётганини қўшимча қилди.
14-сентабр куни АҚШ президенти Доналд Трамп гўёки Украина Россия энергетика обьектларига зарба бермасликка рози бўлганини айтди.
Унинг сўзларига кўра, Россия ҳам худди шундай йўл тутишга рози бўлган.
Шунингдек, Трамп дизел ёқилғиси бўйича жаҳон нархларининг ўсишига гўёки АҚШ-Эрон уруши эмас, балки асосан Россия ва Украина ўртасидаги уруш сабаб бўлганини айтди.